Да Дня сям'і (15 мая) Нацыянальная бібліятэка Беларусі прадстаўляе тэматычную кніжную выстаўку "Шчаслівы той, хто шчаслівы дома", якая размешчана з 5 мая да 21 чэрвеня на кальцавым калідоры 2-га паверха.
Сям’я – найважнейшы сацыяльны інстытут сучаснага грамадства, аснова фарміравання здаровай нацыі. Па становішчы сям’і ў грамадстве і па адносінах да яе дзяржавы можна меркаваць пра развіццё эканомікі і культуры краіны.
У першым раздзеле выстаўкі "Грамадства ў мініяцюры" экспануюцца кнігі, у якіх сям’я разглядаецца як асноўны элемент грамадства, захавальніца чалавечых каштоўнасцей, культуры і гістарычнай пераемнасці пакаленняў. Вядомы амерыканскі педагог Ф. Адлер пісаў: "Сям’я – гэта грамадства ў мініяцюры, ад цэласнасці якога залежыць бяспека ўсяго вялікага чалавечага грамадства".
Нягледзячы на шматвяковую гісторыю матэрыяльнага і духоўнага развіцця цывілізацыі, пытанні сямейных адносін, шлюбу і выхавання дзяцей па-ранейшаму застаюцца актуальнымі ў трэцім тысячагоддзі. Разуменню хрысціянскіх асноў стварэння сям’і, тым самым яе ўмацаванню, можа спрыяць літаратура, прадстаўленая ў раздзеле "Сям’я: святыя ісціны". Аўтары кніг выступаюць за вяртанне ў жыццё простых хрысціянскіх дабрачыннасцей, такіх, напрыклад, як вера, надзея і любоў.
Жадаючы стварыць надзейную, трывалую і шчаслівую сям’ю, многія маладыя людзі яшчэ да ўступлення ў шлюб цікавяцца мастацтвам быць разам. У раздзеле выстаўкі "Галоўней за ўсё – надвор’е ў доме!" сабраныя выданні на тэму псіхалогіі сямейных адносін, сумяшчальнасці мужа і жонкі, кіравання сямейнымі канфліктамі і захавання шлюбу.
Выхаваць здаровае, актыўнае і ўпэўненае ў сабе дзіця – значыць даць яму паспяховы старт у жыццё. Дзеці павінны жыць у свеце прыгажосці, гульні, казкі, музыкі, умець сябраваць і дзейнічаць, быць адказнымі, паважлівымі і ўдзячнымі. Для гэтага іх мамам і татам неабходна валодаць многімі ведамі і навыкамі. Кнігі, прадстаўленыя ў раздзеле "Разумныя бацькі – шчаслівыя дзеці!", раскажуць дарослым, як знаходзіць паразуменне з дзіцём, з дапамогай вясёлых і займальных гульняў развіваць яго фізічны і інтэлектуальны патэнцыял, разумець яго капрызы, арганізаваць жыццёвую прастору і навучанне "асаблівых" дзяцей, ладзіць запамінальныя дзіцячыя святы, а таксама захоўваць даверлівыя адносіны з падлеткамі.
Раздзел "Цеплыня хатняга ачага" прызначаны як жанчыне-гаспадыні, так і гаспадару-мужчыне. Шчасце і крэпасць кожнай сям’і правяраецца не толькі поглядамі мужа і жонкі на выхаванне дзяцей, але і побытам. Навучыцца разумець і паважаць мужчынскія і жаночыя інтарэсы і захапленні, ствараць утульнасць ў доме, планаваць сямейны бюджэт, дзівіць сваё сямейства кулінарнымі вынаходкамі і арыгінальнымі падарункамі, клапаціцца пра здароўе і знешні выгляд адзін аднаго дапамогуць папулярныя выданні айчынных і замежных аўтараў.
Тэлефоны для даведак: (8 017) 293 28 86, 293 29 80.
Карысныя спасылкі
- Рэспубліканскае грамадскае аб’яднанне "Беларускі дзіцячы фонд"
- Прадстаўніцтва Міжнароднага дзіцячага фонду ў Рэспубліцы Беларусь
- Інтэрнэт-праект па пытаннях сям’і
- Сямейны партал
- Сайт па пытаннях мацярынства
- Жаночы клуб
- Сайт па пытаннях адукацыі асоб з асаблівасцямі псіхафізічнага развіцця
Увага! У чытальных залах арганізаваны доступ да поўных спісаў літаратуры, прадстаўленай на ўсіх кніжных выстаўках, якія ладзяцца ў бібліятэцы.