Кніжная і фотавыстаўка “Сэрца, якое мілуе” прысвечана жыццю і дзейнасці мітрапаліта Філарэта (Вахрамеева) (1935–2021), першага Патрыяршага Экзарха ўсяе Беларусі, Героя Беларусі.
У экспазіцыю ўвайшлі 18 планшэтаў з сюжэтнымі фотаздымкамі, каля 50 розных кніжных выданняў, прадстаўленых бібліятэкай імя мітрапаліта Філарэта (Вахрамеева) Мінскай духоўнай акадэміі. Сярод іх ілюстраваныя выданні да юбілеяў мітрапаліта, зборнікі выбраных пропаведзяў, артыкулаў, гутарак, у тым ліку ў перакладзе на нямецкую і англійскую мовы, калядныя і велікодныя пасланні розных гадоў. У выданнях уздымаюцца пытанні актуальнай багаслоўскай праблематыкі, узаемаадносіны царквы і дзяржавы, рэлігійнае, гістарычнае і сацыяльнае прызванне чалавека.
Асоба мітрапаліта Філарэта вядомая як у нашай краіне, так і далёка за яе межамі. Яго служэнне праходзіла ў розных краінах і заўсёды было накіравана на захаванне міру, умацаванне дыялогу царквы і дзяржавы. Уладыка мог размаўляць з кожным чалавекам на блізкай і зразумелай яму мове. Людзі розных узростаў, прафесій, рэлігійных поглядаў – свецкія і святары, чыноўнікі і бізнесмены, багасловы і настаўнікі, дзеці і людзі старэйшага пакалення – кожны мог знайсці ў яго словах тое, што падтрымлівае і ўмацоўвае ў імкненні жыць і імкнуцца да лепшага ў трывожны час сучаснасці.
Аўтары выставы: Аксана Кнаус, фатограф прыхода храма ў гонар святога благавернага князя Аляксандра Неўскага ў Мінску, з 2016 па 2021 год – фатограф мітрапаліта Філарэта, аўтар праекта mf-memory.by; Ілья Перчанка, загадчык бібліятэкі імя мітрапаліта Філарэта, з 2005 па 2021 год – іпадыякан мітрапаліта Філарэта.
Выстава працуе з 10 лістапада да 1 снежня 2022 г. у кальцавой галерэі 2-га паверха.
Дата яе заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Матэрыял пададзены аддзелам галерэйна-выставачнай дзейнасці.