З 12 студзеня па 3 лютага ў зале беларускай літаратуры (пам. 205) праходзіць выстаўка "Саюз часу, мудрасці і майстэрства", прысвечаная 90-годдзю Міколы (Мікалая Якаўлевіча) Аўрамчыка, беларускага пісьменніка і перакладчыка.
Паэзія і проза пісьменніка прасякнуты палымянай любоўю да Радзімы, нянавісцю да фашызму, пакутлівымі перажываннямі ў фашысцкай няволі, радасцю Перамогі над ворагам, рамантыкай студэнцкага жыцця, пафасам стваральнай працы, дружбы і салідарнасці народаў краіны і свету.
Экспазіцыя змяшчае больш за 200 дакументаў і складаецца з чатырох раздзелаў.
У раздзеле "Шчыра і паэтычна" прадстаўлены "Выбраныя творы" у 2-х т. (1980), "Выбранае" (1976), "Анкета: выбраныя вершы, паэмы, успаміны" (1990), а таксама асобна выдадзеныя зборнікі паэзіі Мікалая Якаўлевіча "Пярэдні край" (1949), "Шляхамі дружбы"(1952), "Ключы жураўліныя" (1960), "Сустрэча былых канагонаў" (1963), "Універсітэцкі гарадок" (1967), "Агледзіны" (1969), "Дрэва дружбы" (1973), "Радовішча" (1976), "Запрашэнне да роздуму" (1994) і інш.
Тут жа экспануюцца празаічныя творы аўтара: раман "У падзямеллі" (1986), аповесць "Палон" (1991) і зборнік нарысаў, прысвечаных беларускім празаікам, паэтам, грамадскім дзеячам, "Знаёмыя постаці" (2004).
Раздзел "Выразнасць і акрэсленасць думкі" змяшчае творы М. Аўрамчыка, выдадзеныя ў перакладах.
Мікалай Якаўлевіч вядомы і высокакваліфікаваны перакладчык. Раздзел "Майстэрства перакладчыка" раскрывае багацце яго перакладаў на беларускую мову твораў пісьменнікаў свету.
З жыццём і творчай дзейнасцю Мікалая Якаўлевіча пазнаёмяць публікацыі, змешчаныя ў энцыклапедычных выданнях, калектыўных зборніках, часопісах, якія экспануюцца ў раздзеле "Кніга жыцця". Тут таксама прадстаўлены вершы, якія прысвяцілі М. Аўрамчыку яго сябры і калегі па пяру: А. Пысін, П. Прыходзька, А. Вольскі, К. Камейша, А. Вярцінскі, А. Ставер, Т. Бондар і інш.
Выстаўка багата ілюстравана фотаздымкамі пісьменніка.
Кантактны тэлефон: 293-27-16.
 |
 |
 |
