З 7 лютага па 17 сакавіка ў зале дакументаў міжнародных арганізацый (пам. 207g) арганізавана выстаўка “Сацыяльная справядлівасць у глабальным свеце”, прысвечаная Сусветнаму дню сацыяльнай справядлівасці.
Гэты Дзень быў абвешчаны на 62-й сесіі Генеральнай Асамблеяй ААН 26 лістапада 2007 года (рэзалюцыя A/RES/62/10), і штогод адзначаецца 20 лютага, пачынаючы з 2009 года.
У сваёй рэзалюцыі Генеральная Асамблея падкрэсліла, што сацыяльнае развіццё і сацыяльная справядлівасць неабходныя для забеспячэння і падтрымання міру і бяспекі унутры краін і ў адносінах паміж імі.
Асамблея таксама прызнала, што глабалізацыя і ўзаемазалежнасць, дзякуючы міжнароднаму гандлю, інвестыцыям і патокам капіталу, а таксама дасягненням у тэхналогіях, адкрываюць новыя магчымасці для росту сусветнай эканомікі, уздыму і паляпшэння ўзроўню жыцця ва ўсім свеце. Аднак сёння існуюць сур’ёзныя праблемы, уключаючы фінансавыя крызісы, беднасць, адчужэнне і няроўнасць унутры сацыяльных груп з розным узроўнем жыцця і паміж імі. Захоўваюцца значныя перашкоды для далейшай інтэграцыі ў глабальную эканоміку і ўдзелу ў ёй краін, якія развіваюцца, а таксама некаторых краін з пераходнай эканомікай.
Усведамляючы важнасць і сур’ёзнасць гэтых праблем, Генеральная Асамблея ААН заявіла аб неабходнасці далейшага нарошчвання намаганняў міжнароднага супольніцтва ў сферы выкаранення беднасці, забеспячэння поўнай занятасці і годнай працы, роўнасці мужчын і жанчын, а таксама доступу да сацыяльнага дабрабыту і сацыяльнай справядлівасці для ўсіх.
Справядлівасць – гэта аснова дэмакратычнага грамадства, якая забяспечвае ўсім сваім членам роўныя правы і магчымасці. Сацыяльная справядлівасць дэкларуе павагу да кожнага чалавека, нацыі і дзяржавы. ААН лічыць імкненне да сацыяльнай справядлівасці адной з сваіх галоўных місій і прыкладае велізарныя намаганні для рашэння пытанняў сацыяльнага развіцця.
У сакавіку 1995 у Капенгагене прайшла Сусветная сустрэча на вышэйшым узроўні ў інтарэсах сацыяльнага развіцця, на якой былі абвешчаны задачы сацыяльнага развіцця сучаснага грамадства. Кіраўнікі 117 дзяржаў і ўрадаў прынялі Капенгагенскую дэкларацыю аб сацыяльным развіцці і Праграму дзеянняў, дзе замацавалі пэўныя абавязацельствы па паляпшэнні ўмоў жыцця чалавека.
Праз пяць гадоў, у 2000 годзе, дзяржавы – члены ААН правялі 24-ю спецыяльную сесію Генеральнай Асамблеі ў інтарэсах сацыяльнага развіцця. Яны прааналізавалі вынікі ажыццяўлення капенгагенскіх рашэнняў, вызначылі асноўныя перашкоды і шляхі іх ліквідацыі. Галоўны вывад сустрэчы 2000 года заключаўся ў тым, што эканамічны рост дзяржаў павінен быць звязаны з павышэннем якасці жыцця людзей.
10 чэрвеня 2008 года Міжнародная арганізацыя працы аднагалосна прыняла Дэкларацыю МАП аб сацыяльнай справядлівасці ў мэтах справядлівай глабалізацыі. У ёй гаворыцца аб гарантыі дасягнення справядлівых вынікаў для ўсіх шляхам забеспячэння занятасці, сацыяльнай абароны, сацыяльнага дыялогу і асноўных прынцыпаў і праў на працоўным месцы.
Прапанаваная чытачам выстаўка налічвае каля 70 дакументаў. Вялікую частку экспазіцыі складаюць дакументы міжнародных арганізацый (ААН, ЮНЕСКА, Еўрапейскага саюза, Савета Еўропы і інш.) на рускай і англійскай мовах: кнігі, перыядычныя выданні, мімеаграфаваныя матэрыялы ААН, брашуры, буклеты.
Экспазіцыя ўключае наступныя тэматычныя раздзелы:
- Міжнароднае, рэгіянальнае і міжрэгіянальнае супрацоўніцтва ў інтарэсах сацыяльнага развіцця і справядлівасці;
- Выкараненне галечы;
- Забеспячэнне поўнай занятасці і годнай працы;
- Абарона і падтрымка праў чалавека і гендэрнай роўнасці;
- Усеагульны доступ да адукацыі і якасных паслуг аховы здароўя;
- Аказанне дапамогі эканамічнаму, сацыяльнаму і культурнаму развіццю найменш развітых краін і краін з пераходнай эканомікай.
Выстаўка будзе цікавая студэнтам, магістрантам, выкладчыкам сацыяльна-эканамічных дысцыплін, палітычным і грамадскім дзеячам, спецыялістам у галіне міжнароднага права, сусветнай палітыкі, міжнародных адносін і праў чалавека, работнікам сацыяльнай сферы.
Карысныя спасылкі
- Мэты развіцця тысячагоддзя
- Сацыяльнае развіццё
- Аддзел сацыяльнай палітыкі і развіцця *
- Камісія сацыяльнага развіцця
- Эканамічны і сацыяльны савет (ЭКАСАС)
- Спецыяльная сесія Генеральнай Асамблеі (2000 год)
- Сусветная сустрэча на вышэйшым узроўні ў інтарэсах сацыяльнага развіцця (1995 год)
- Барацьба супраць галечы
- Галеча і ўстойлівае развіццё
- Другое дзесяцігоддзе ААН па барацьбе за ліквідацыю галечы (2008–2017 гады)
- Міжнародны дзень барацьбы за ліквідацыю галечы (17 кастрычніка)
- Сусветны дзень сацыяльнай справядлівасці
Дакументы
- Рэзалюцыі Генеральнай Асамблеі
- Рэзалюцыі ЭКАСАС
- Даклад аб сусветным сацыяльным становішчы
- Агляд сусветнага эканамічнага і сацыяльнага становішча
- Капенгагенская дэкларацыя і Праграма дзеянняў, прынятыя на Сусветнай сустрэчы на вышэйшым узроўні ў інтарэсах сацыяльнага развіцця
- Дэкларацыя МАП аб асноватворчых прынцыпах і правах у сферы працы і механізм яе рэалізацыі
- Дэкларацыя МАП аб сацыяльнай справядлівасці ў мэтах справядлівай глабалізацыі