З 28 ліпеня па 31 жніўня ў зале беларускай літаратуры (пам. 205) праходзіць выстаўка “Самаадданае служэнне навуцы”, прысвечаная 90-годдзю з дня нараджэння беларускага этнолага В.К. Бандарчыка (1920–2009).
З-пад пяра члена-карэспандэнта НАН Беларусі, доктара гістарычных навук, прафесара, заслужанага работніка культуры Беларусі, лаўрэата прэміі НАН Беларусі Васіля Кірылавіча Бандарчыка выйшлі 27 манаграфій і каля 270 артыкулаў па пытаннях гісторыі і сучаснай беларускай этнаграфіі, фальклору, матэрыяльнай і духоўнай культуры беларусаў.
Васіль Кірылавіч годна прадстаўляў беларускую этналагічную навуку на шматлікіх міжнародных кангрэсах, якія праходзілі ў Маскве, Чыкага, Дэлі, Таронта, з’яўляўся актыўным удзельнікам з’ездаў славістаў і канферэнцый этнолагаў у Польшчы, Балгарыі, Чэхіі, Славакіі.
Экспазіцыя змяшчае каля 130 дакументаў. У першым раздзеле выстаўкі “Асэнсаванне здабыткаў народа” прадстаўлены асноўныя навуковыя працы вучонага, а таксама выданні, навуковым рэдактарам якіх ён з’яўляўся: “Гісторыя беларускай этнаграфіі ХІХ ст.” (1964), “’Гісторыя беларускай этнаграфіі. Пачатак ХХ ст.” (1970), “Гісторыя беларускай савецкай этнаграфіі “ (1972), “Этнические процессы и образ жизни” (1980), “Промыслы і рамёствы Беларусі” (1984), “Этнаграфія беларусаў” (1985), шматтомнае фундаментальнае выданне “Беларусы” (1995–2005) і інш.
У другім раздзеле выстаўкі “Выдатны беларускі этнограф” экспануюцца публікацыі пра жыццё і навуковую дзейнасць В.К. Бандарчыка.
Кантактны тэлефон: 293-27-16.