З 25 кастрычніка па 26 лістапада ў зале беларускай літаратуры (пам. 205) праходзіць выстаўка “Рупнасць і няўрымслівасць”, прымеркаваная да 100-годдзя з дня нараджэння Ю.С. Пшыркова (1912–1980).
Юльян Сяргеевіч Пшыркоў – беларускі літаратуразнавец, крытык, заслужаны дзеяч навукі Беларусі (1978), лаўрэат Дзяржаўнай прэміі імя Я. Коласа (1980) за ўдзел у напісанні працы “История белорусской дооктябрьской литературы”.
Таленавіты літаратуразнавец даследаваў творчасць Я. Коласа і іншых беларускіх пісьменнікаў. Па словах самога Я. Коласа, “…ён першы, хто правільна ацаніў «Новую зямлю»”. З канца 50-х гг. XX ст. Ю.С. Пшыркоў займаўся даследаваннем гісторыі ўзнікнення і развіцця беларускай прозы, але пры гэтым заставаўся верным абранай тэме – творчасці Я. Коласа. Яго навукова абгрунтаваныя манаграфіі “Эпас рэвалюцыі” і “Трылогія Якуба Коласа «На ростанях»” сталі ўзорам для пачынаючых даследчыкаў. Глыбіня, дакладнасць, нестандартнасць выказванняў і думак спалучаюцца з прыгожай беларускай мовай у манаграфіях і падручніках аўтара.
Юльян Сяргеевіч быў не толькі таленавітым навукоўцам, але і выдатным выкладчыкам. Яго студэнты – Алег Лойка, Уладзімір Дамашэвіч, Міхась Ярош, Міхась Мушынскі, Міхаіл Цікоцкі, Ірына Крэнь і іншыя – сталі вядомымі літаратуразнаўцамі і пісьменнікамі.
Выстаўка складаецца з чатырох раздзелаў: “Творчы неспакой даследчыка”, “Натхнёныя крылы таленту”, “Пакінутае людзям” і “Святло яго душы”.
Першыя два раздзелы прадстаўляюць манаграфіі і падручнікі Ю.С. Пшыркова, а таксама калектыўныя зборнікі і перыядычныя выданні, у якіх змешчаны артыкулы даследчыка.
Трэці раздзел знаёміць з рэдактарскай дзейнасцю навукоўца – зборамі твораў М. Лынькова, Я. Коласа, К. Чорнага, Я. Купалы і інш.
Апошні раздзел уключае кнігі, энцыклапедыі і перыядычныя выданні, у якіх змешчаны матэрыялы пра жыццё і творчасць Юльяна Сяргеевіча Пшыркова.
Кантактны тэлефон: (8 017) 293 27 16.
 |
 |
 |
 |
 |
 |
