З 27 кастрычніка па 9 лістапада 2009 года ў зале беларускай літаратуры (пам. 205) праходзіць выстаўка “Роздум і слова”, прысвечаная 100-годдзю з дня нараджэння Максіма Лужаніна (1909–2001).
Максім Лужанін (Каратай Аляксандр Амвросьевіч) – беларускі пісьменнік, кінадраматург, перакладчык, заслужаны дзеяч мастацтваў Беларусі (1969), лаўрэат Літаратурнай прэміі імя Я. Коласа (1965).
Творчая спадчына пісьменніка багатая і разнастайная. Вершы і апавяданні, публіцыстычныя артыкулы і пераклады – гэта няпоўны пералік літаратурных прац Максіма Лужаніна. Літаратуразнавец і крытык У. Гніламёдаў, характарызуючы творчасць пісьменніка, зазначаў: “Майстэрня слова, кузня слова – гэта можна сказаць пра яго творчую лабараторыю”.
Выстаўка складаецца з чатырох раздзелаў. У раздзеле “Моваю сэрца” прадстаўлены асобна выдадзеныя творы М. Лужаніна. Сярод іх першая кніга пісьменніка – зборнік вершаў “Крокі”, – выдадзеная ў 1928 г. Экспануюцца зборнікі вершаў і паэм “Неаплачаны рахунак” (1930), “Галасуе вясна за вясну” (1931), “Адгалосна” (1931), “Галасы гарадоў” (1932), зборнік твораў ваеннага перыяду “Шырокае поле вайны” (1945), зборнікі пасляваеннай паэзіі “Поступ” (1950), “Святло Радзімы” (1952) і інш.
У наступных двух раздзелах пісьменнік выступае як перакладчык, сцэнарыст, рэдактар і ўкладальнік.
Апошні раздзел выстаўкі “Свеціць сваім святлом” прысвечаны жыццю і творчасці юбіляра.
На выстаўцы прадстаўлена каля 90 выданняў.
Кантактны тэлефон: 293-27-16.
 |
 |
 |
