Нацыянальная бібліятэка Беларусі віншуе жыхароў і гасцей Мінска з надыходзячым Днём горада і запрашае наведаць святочную кніжную экспазіцыю “Родны мой горад, любоў мая…”.
Мінск – сталіца і самы буйны горад Рэспублікі Беларусь з багатым гістарычным мінулым. Першыя звесткі пра Мінск выяўлены ў “Аповесці мінулых гадоў” і адносяцца да падзей 1067 года, калі адбылася бітва на Нямізе паміж полацкім князем Усяславам Чарадзеем і кіеўскім князем Ізяславам Яраславічам. На працягу сваёй амаль тысячагадовай гісторыі Мінск быў цэнтрам удзельнага княства, ваяводства ў складзе Вялікага Княства Літоўскага, губерні Расійскай імперыі, сталіцай БССР. Сённяшні Мінск – сталіца суверэннай Рэспублікі Беларусь, сучасны еўрапейскі горад з развітой інфраструктурай. Яго архітэктурнае аблічча, якое складвалася на працягу стагоддзяў, захавала сляды культуры розных стыляў і эпох, народаў і рэлігійных канфесій.
Адкрыць невядомыя старонкі жыцця беларускай сталіцы, пазнаёміцца з гісторыяй старажытнага і сучаснага Мінска, з яго галоўнымі вуліцамі і плошчамі, архітэктурнымі пабудовамі, манументальнымі помнікамі дапаможа прапанаваная кніжная выстаўка. У экспазіцыю ўключана каля 150 найноўшых выданняў. Гэта літаратура па гісторыі горада і сучасным стане сталіцы, энцыклапедыі, даведнікі, кнігі пра знакамітых людзей, якія нарадзіліся на мінскай зямлі.
Цікавым з’яўляецца навукова-папулярнае выданне “История Минска в открытках и фотографиях”. У кнізе сабраны фотавыявы славутасцей Мінска на старых паштоўках і сучасных фатаграфіях, прыводзіцца іх гісторыя, апісанне, старыя і сучасныя назвы.
Усім, хто цікавіцца гісторыяй Мінска, таксама будзе цікава азнаёміцца з кнігай пісьменніка і энцыклапедыста Леаніда Маракова “Галоўная вуліца Мінска”. Кніга ўяўляе сабой сапраўдную энцыклапедыю жыцця Захар’еўскай вуліцы (цяпер праспект Незалежнасці). У гэтым выданні прыведзены апісанні і планы дамоў, пералічваюцца імёны іх жыхароў, біяграфіі, гісторыі іх жыцця. Выданне багата дапоўнена фатаграфіямі, дакументамі, планамі, вялікая частка з якіх публікуецца ўпершыню.
У Рэспубліцы Беларусь 2016 год абвешчаны Годам культуры. У спецыяльным раздзеле “Духоўнае жыццё Мінска” сабраны кнігі пра тэатры, музеі, фестывалі, бібліятэкі сталіцы. Жамчужынай выстаўкі можна назваць кнігу “Большая энциклопедия Большого театра Беларуси”, якая стала пераможцай у намінацыі “Залатыя скрыжалі” на Нацыянальным конкурсе “Мастацтва кнігі – 2015”.
Экспазіцыя размешчана на 2-м паверсе кальцавога калідора і будзе дэманстравацца з 24 жніўня па 15 лістапада 2016 г.
Кантактныя тэлефоны: (8 017) 293 28 86, 293 29 80.