З 1 красавіка па 5 чэрвеня ў зале прававой інфармацыі (пам. 207b) арганізавана тэматычная кніжная выстаўка “Рэспубліка Беларусь. Герб. Гімн. Сцяг” да Дня Дзяржаўнага герба і Дзяржаўнага сцяга Рэспублікі Беларусь.
Кожная сучасная дзяржава мае свае знакі, якія выражаюць яе палітычную самастойнасць і незалежнасць, гісторыю станаўлення і развіцця, нацыянальную самабытнасць. Краіна, якая не беражэ свае святыні, не шануе свой дзяржаўны герб і сцяг, не вучыць новыя пакаленні разумець, шанаваць і паважаць дзяржаўныя знакі, рызыкуе будучыняй свайго народа. У адпаведнасці з артыкулам 19 Канстытуцыі Рэспублікі Беларусь Дзяржаўны сцяг, Дзяржаўны герб і Дзяржаўны гімн з’яўляюцца знакамі дзяржаўнага суверэнітэту рэспублікі.
14 мая 1995 года ў Беларусі адбыўся ініцыяваны прэзідэнтам Рэспублікі Беларусь А.Р. Лукашэнкам агульнанацыянальны рэферэндум па пытанні аб нацыянальнай сімволіцы. За прапанаваныя прэзідэнтам варыянты герба і сцяга прагаласавала 75,1 % прыняўшых удзел у рэферэндуме. Пасля апублікавання вынікаў галасавання прэзідэнт 7 чэрвеня 1995 года выдаў Указ № 213 “Об утверждении эталона Государственного герба Республики Беларусь и Положения о Государственном гербе Республики Беларусь”. Так наша краіна набыла свае дзеючыя цяпер Дзяржаўны герб і Дзяржаўны сцяг, якія нараўне з Дзяржаўным гімнам з’яўляюцца асноўнымі атрыбутамі дзяржаўнасці, сімваламі суверэнітэту Рэспублікі Беларусь.
5 ліпеня 2004 года быў прыняты Закон Рэспублікі Беларусь “О государственных символах Республики Беларусь”, які накіраваны на прававое рэгуляванне пытанняў дзяржаўных сімвалаў нашай краіны, устаноўленых Канстытуцыяй, і вызначае апісанне і парадак іх выкарыстання.
Дзяржаўныя сімвалы Рэспублікі Беларусь прайшлі доўгі шлях станаўлення, развіцця і сцвярджэння. У іх клапатліва захаваны рысы, якія адлюстроўваюць мірныя, стваральныя мэты беларускага народа і дзяржавы. Герб, гімн і сцяг Рэспублікі Беларусь з дапамогай простых і зразумелых сродкаў адлюстроўваюць патрыятычныя, гістарычныя, культурныя традыцыі краіны, характар народа, яго духоўны патэнцыял. Яны надзелены яркімі рысамі і лёгка пазнавальныя сярод усіх дзяржаўных сімвалаў сусветнай супольнасці.
Герб, сцяг і гімн – галоўныя сімвалы незалежнасці, якія перадаюць гісторыка-культурную спадчыну нашага народа, падкрэсліваюць нацыянальны дух і годнасць беларускіх грамадзян.
Экспазіцыя налічвае каля 40 дакументаў і ўключае наступныя тэматычныя раздзелы:
- Гісторыя развіцця сімвалаў дзяржаўнасці Беларусі.
- Сучасныя сімвалы Рэспублікі Беларусь.
- Дзяржаўны гімн як атрыбут дзяржаўнасці Рэспублікі Беларусь.
Выстаўка будзе цікавай самаму шырокаму кругу чытачоў.
Кантактны тэлефон: 293-27-28.