ГалоўнаяНавіныКніжныя выстаўкі
Кампетэнтна і падрабязна
Віртуальны ваяж па тэатрах нашай краіны – з вэб-сайтам “Беларусь у інфармацыйнай прасторы”

Разарваць кола маўчання: жанчыны і насілле

Разарваць кола маўчання: жанчыны і насілле
Іншыя навіны

З 21 лістапада 2019 г. па 9 студзеня 2020 г. у аддзеле абслугоўвання афіцыйнымі дакументамі Нацыянальнай бібліятэкі Беларусі (пам. 207) адкрыта тэматычная кніжная выстаўка “Разарваць кола маўчання: жанчыны і насілле”, прысвечаная Міжнароднаму дню барацьбы за ліквідацыю насілля адносна жанчын.

Гэты дзень быў абвешчаны Генеральнай асамблеяй ААН 17 снежня 1999 г. (рэзалюцыя 54/134) і штогод адзначаецца 25 лістапада.

Насілле адносна жанчын і дзяўчынак з’яўляецца адным з найбольш шырока распаўсюджаных, цяжкавыкараняльных парушэнняў праў чалавека ў сучасным свеце, якое вядзе да катастрафічных наступстваў. Яно з’яўляецца маральнай абразай, ганебным кляймом на чалавецтве, значнай перашкодай на шляху да інклюзіўнага, справядлівага і ўстойлівага развіцця.

Насілле распаўсюджана паўсюль у свеце і ўласціва ўсім грамадствам і культурам, закранаючы жанчын незалежна ад іх расы, этнічнай прыналежнасці, сацыяльнага становішча, дастатку, паходжання або любых іншых абставін. Яно караніцца ў гістарычнай няроўнасці ў адносінах паміж мужчынамі і жанчынамі, а таксама ў бесперапыннай дыскрымінацыі.

Жанчыны сутыкаюцца з насіллем у прававой сферы і ў паўсядзённым жыцці. Роўныя правы жанчын, абвешчаныя дэ-юрэ, не з’яўляюцца такімі дэ-факта і часта парушаюцца ў большасці краін. Насілле можа прымаць мноства форм: ад бытавых замахаў да гандлю людзьмі, ад сексуальнага насілля ва ўмовах канфлікту да дзіцячых шлюбаў, калечання палавых органаў і феміцыду. Яно робіць шкоду асобе і становіцца сур’ёзнымі наступствамі для сем’яў і грамадства.

Паводле ацэнак ААН каля 35 % жанчын у свеце падвяргаюцца сёння фізічнаму насіллю. У некаторых краінах колькасць жанчын-ахвяр фізічнага або сексуальнага насілля з боку партнёраў дасягае 70 %. Прыкладна 120 млн дзяўчат ва ўзросце да 20 гадоў хаця б аднойчы ў жыцці станавіліся ахвярамі сексуальнага насілля. 200 млн жанчын перанеслі аперацыі на палавых органах. Колькасць непаўналетніх дзяўчынак, прымусова выдадзеных замуж, складае больш за 700 млн. Штогод ва ўсім свеце прадаюцца сотні тысяч жанчын. І зараз у шэрагу краін свету забіваюць зародкаў і немаўлят жаночага полу.

Для ліквідацыі насілля патрабуюцца комплексныя і сістэматычныя намаганні дзяржаў, міжнародных арганізацый і ўсіх зацікаўленых бакоў. Усведамляючы ўсю значнасць гэтай праблемы, у 1979 г. прынялі Канвенцыю аб ліквідацыі ўсіх форм дыскрымінацыі адносна жанчын, а ў 1993 г. – Дэкларацыю аб выкараненні насілля адносна жанчын. Гэтыя дакументы былі накіраваны на прыняцце канкрэтных мер па прадухіленні і выкараненні насілля адносна жанчын і дзяўчынак ва ўсім свеце. Яшчэ адным крокам у гэтым кірунку стала абвяшчэнне Генеральным сакратаром ААН у лютым 2008 г. кампаніі “Разам пакончыць з насіллем адносна жанчын”, мэтай якой з’яўлялася распаўсюджанне інфармацыі, а таксама актывізацыя намаганняў усіх бакоў у гэтай галіне.

У 2017 г. Еўрапейскі саюз і Арганізацыя Аб’яднаных Нацый прыступілі да ажыццяўлення новай доўгатэрміновай глабальнай ініцыятывы “Прамень святла”, накіраванай на выкараненне ўсіх форм насілля адносна жанчын і дзяўчынак. Згодна з Парадкам дня ў галіне ўстойлівага развіцця на перыяд да 2030 года гэта ініцыятыва будзе ў поўнай меры ўлічваць прынцып “ніхто не будзе забыты”.

Дакументы, прадстаўленыя на выставе, раскрываюць шматгранную дзейнасць ААН, іншых міжнародных арганізацый, жаночых рухаў і аб’яднанняў, накіраваную на барацьбу з насіллем адносна жанчын, знаёмяць з рознымі аспектамі вывучэння гендэрных праблем, раскрываюць ролю жанчыны ў сучасным грамадстве.

У экспазіцыі прадстаўлена больш за 80 дакументаў на рускай, англійскай, французскай і нямецкай мовах: кнігі, перыядычныя выданні, мімеаграфаваныя матэрыялы ААН (мастхед), брашуры, буклеты.

Увазе наведвальнікаў прапанаваны наступныя раздзелы:

  • Міжнародныя і рэгіянальныя прававыя дакументы, накіраваныя на ліквідацыю насілля адносна жанчын
  • Праблема насілля адносна жанчын у Рэспубліцы Беларусь
  • Дамашняе насілле. Хатні гвалт. Меры па папярэджанні і спыненні насілля адносна жанчын у сям’і
  • Жанчына і ўзброеныя канфлікты
  • Жанчына як тавар – праблема гандлю людзьмі
  • Сацыяльная няроўнасць і гендэрная дыскрымінацыя

Выстава будзе цікавая для студэнтаў, выкладчыкаў, сацыяльных педагогаў, псіхолагаў, юрыстаў, спецыялістаў у сферы процідзеяння гандлю людзьмі, актывістаў праваабарончых і няўрадавых арганізацый.

Карысныя спасылкі

Дэкларацыі, канвенцыі і пагадненні


Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.

Тэлефон для даведак: (8 017) 293 27 34.

Матэрыял прадастаўлены аддзелам абслугоўвання афіцыйнымі дакументамі.

Навіны

У Маскве адкрылася выстаўка “Сімяон, сын Полацка”

13 Сне 2019

12 снежня ў Дзелавым і культурным комплексе Пасольства Рэспублікі Беларусь у Расійскай Федэрацыі адкрылася кніжна-ілюстрацыйная выстаўка “Сімяон, сын Полацка”, прысвечаная 390-годдзю з дня нараджэння дзяржаўнага, царкоўнага і культурнага дзеяча Беларусі і Расіі.

Кніжныя выстаўкі

“Школа даследчыка” навучыць, дзе і як шукаць літаратуру

13 Сне 2019

Нацыянальная бібліятэка Беларусі валодае шырокім спектрам электронных інфармацыйных рэсурсаў, якія адлюстроўваюць не толькі нашы фонды і фонды іншых бібліятэк, але і дзясяткі мільёнаў лепшых сусветных публікацый з ліцэнзійных баз даных.

Навіны Нацыянальнай бібліятэкі Беларусі

Доўгая дарога да дома Караткевіча

13 Сне 2019

Адзін з найзначнейшых юбілеяў, якія будуць адзначацца ў надыходзячым 2020-м — 90-годдзе з дня нараджэння Уладзіміра Караткевіча. Як налета збіраюцца ўшанаваць памяць аб славутым земляку на ягонай малой радзіме — пакрысе высвятляецца ўжо сёння.

Навіны бібліятэк

Статус гісторыка-культурнай каштоўнасці атрымае феномен “Паўлінкі” Купалаўскага тэатра

12 Сне 2019

Статус гісторыка-культурнай каштоўнасці атрымае тэатральны феномен спектакля “Паўлінка” Нацыянальнага акадэмічнага тэатра імя Янкі Купалы. Такую прапанову сёння падтрымаў Беларускі рэспубліканскі навукова-метадычны савет па пытаннях гісторыка-культурнай спадчыны пры Міністэрстве культуры, паведамілі ў Мінкульце.

Навіны бібліятэк

Пра беларускіх ілюстратараў, якія прысвяцілі талент Яе Вялікасці Кнізе

11 Сне 2019

“Я не самотны, я кнігу маю…” – невыпадкова радок з верша Максіма Багдановіча прагучаў на ўрачыстай прэзентацыі кнігі журналіста Вольгі Паўлючэнкі “Малюнак пад кніжнай вокладкай”, якая адбылася 10 снежня ў бібліятэцы.

Навіны Нацыянальнай бібліятэкі Беларусі

111