З 1 па 20 студзеня 2008 года ў зале беларускай літаратуры (пам. 205) праходзіць кніжная выстаўка «Пяснярка з Прынямоння», прысвечаная 70-годдзю Дануты Бічэль-Загнетавай, беларускай паэтэсы, лаўрэата Дзяржаўнай прэміі імя Янкі Купалы (1984; за зборнік вершаў «Дзе ходзяць басанож»).
Паэзіі Д. Бічэль-Загнетавай уласцівы шчырасць інтанацый, тонкі лірызм, сувязь сучаснасці з мінулым, любоў да чалавека, краявідаў, роднай зямлі.
Асноўным у яе шчырай, усхваляванай лірычнай споведзі з’яўляецца пачуццё грамадзянскай адказнасці, годнасці і гонару за Беларусь, за свой Прынёманскі край, бацькоўскую зямлю. Змест яе лірыкі складаюць праблемы сучаснасці і гістарычнага мінулага, трывога за мір на планеце, высокія маральна-этычныя прынцыпы чалавечых узаемаадносін, вернасць, сяброўства, каханне, мацярынства.
У экспазіцыі – зборнікі паэзіі «Дзявочае сэрца» (1961), «Нёман ідзе» (1964), «Запалянкі» (1967), «Доля» (1972), «Ты – гэта ты» (1976), «Браткі» (1979), «Дзе ходзяць басанож» (1983),«А на Палессі» (1990), «Божа мой, Божа» (1992), «Снапок» (1999),«На белых аблоках сноў» (2002), «Стакроткі ў вяночак Божай Маці» (2004). Значную частку літаратурнай спадчыны Д. Бічэль-Загнетавай складаюць творы, напісаныя для дзяцей: «Перапёлка» (1968), «Дагані на кані» (1973), «Габрынька і Габрусь» (1985), «Гараднічанка» (1993) і іншыя.
У асобны раздзел экспазіцыі ўвайшлі кнігі, складальнікам і аўтарам прадмоў да якіх з’яўляецца Д. Бічэль-Загнетава.
Сярод экспанатаў выстаўкі – выданні твораў паэтэсы, перакладзеныя на рускую, украінскую, польскую і англійскую мовы.
Аб творчым і жыццёвым лёсе Дануты Янаўны раскажуць прадстаўленыя на выстаўцы матэрыялы з перыядычнага друку: артыкулы М. Новік “З намі Нёман, з намі Бог”, А. Нікіпорчык “Звініць ва мне Боская нота” і іншыя. Даследаванню творчасці паэтэсы прысвечаны таксама аўтарэферат А.М. Петрушэвіч “Поэзия Д. Бичель-Загнетовой. Проблема лирическог героя”. Цікавымі для наведвальнікаў выстаўкі будуць і змешчаныя ў часопісе “Наша вера” лісты, адрасаваныя Д. Бічэль-Загнетавай Наталлей Арсенневай.
Выстаўка налічвае звыш 70-ці дакументаў.
Кантактны тэлефон 293-27-16