З 30 верасня па 19 кастрычніка ў зале дакументаў па мастацтве (пам. 306) праходзіць кніжна-ілюстрацыйная выстаўка “Прызванне – Настаўнік!”, прымеркаваная да Дня настаўніка.
Выбіраючы прафесію, чалавек міжволі задумваецца пра сваю будучыню, ажыццяўленне сваіх жыццёвых планаў, пра цяжкасці, якія могуць узнікнуць. Хтосьці неўсвядомлена робіць прафесійны выбар, а для кагосьці будучая прафесія з’яўляецца прызначэннем. Не выключэннем з’яўляецца складаная і працаёмкая работа настаўніка, якая патрабуе павышанай адказнасці і ўвагі.
Мысліцелі і філосафы, пісьменнікі і педагогі, мастакі і вучоныя ўсіх часоў неаднаразова падкрэслівалі высокае грамадскае значэнне настаўніка. “Для таго каб навучаць іншага, патрабуецца больш розуму, чым для таго, каб навучыцца самому”, – лічыў М. дэ Мантэнь. “Кепскі настаўнік падае ісціну, добры вучыць яе знаходзіць”, – казаў А. Дыстэрвег. Па меркаванні ж Л.М. Талстога, прызначэнне настаўніка ёсць прызначэнне высакароднае.
На выстаўцы экспануюцца кнігі і вучэбныя дапаможнікі, даведачная літаратура і перыядычныя выданні, прысвечаныя прафесіі настаўніка, а таксама праблемам і перспектывам выкладання. Аўтары раскрываюць гэтую тэму з розных бакоў – у кантэксце ўзаемадзеяння настаўніка не толькі з вучнямі, але і іх бацькамі, аднагодкамі, грамадствам.
Зацікавяць наведвальнікаў працы выдатных педагогаў – А. Макаранкі, У. Сухамлінскага, Я. Корчака, К. Ушынскага. Будуць карыснымі і сучасныя падручнікі па педагогіцы беларускіх аўтараў, практычныя парады пачынаючым настаўнікам, распрацоўкі ўрокаў па розных прадметах, уключаючы выкладанне мастацтва.
Ажыўляюць экспазіцыю вобразы настаўнікаў ва ўяўленні мастакоў. Сярод іх – рэпрадукцыі карцін А. Бархаткова, Ф. Рашэтнікава, М. Багданава-Бельскага, якога сучаснікі называлі “апявальнікам сельскага школьніка”, а таксама плакаты і паштоўкі. Не пакіне раўнадушнымі наведвальнікаў і мастацкая літаратура, прысвечаная настаўнікам.
Усяго экспазіцыя налічвае звыш 50 дакументаў.
Кантактны тэлефон: (8 017) 293 27 53.
 |
 |
 |
 |
 |
 |
