З 11 студзеня па 27 сакавіка ў зале прававой інфармацыі (пам. 207b) арганізавана выстаўка “Прыклад служэння Айчыне, праву і навуцы: да 95-годдзя з дня нараджэння Юхо Іосіфа Аляксандравіча”.
Найбуйнейшы спецыяліст па Статутах Вялікага Княства Літоўскага, палітычнай і дзяржаўна-прававой гісторыі сярэдневяковай беларускай дзяржавы, доктар юрыдычных навук Іосіф Аляксандравіч Юхо нарадзіўся ў Мінску. У 1938 г. стаў студэнтам Беларускага політэхнічнага інстытута. Вялікую Айчынную вайну сустрэў курсантам Горкаўскага вучылішча зенітнай артылерыі. Да апошніх дзён вайны Іосіф Аляксандравіч знаходзіўся на фронце, некалькі разоў быў паранены.
Пасля дэмабілізацыі ў 1946 г. паступіў у Мінскі юрыдычны інстытут. Па заканчэнні некаторы час працаваў народным суддзёй. У 1951 г. І. Юхо – аспірант Інстытута філасофіі і права АН БССР. Абараніўшы дысертацыю, застаўся супрацоўнікам інстытута.
З 1958 г. лёс Іосіфа Аляксандравіча непарыўна звязаны з Беларускім дзяржаўным універсітэтам. Спачатку ён быў залічаны дацэнтам юрыдычнага факультэта, некалькі гадоў працаваў загадчыкам кафедры гісторыі дзяржавы і права, намеснікам дэкана факультэта. У 1980 г. Іосіф Аляксандравіч абараніў доктарскую дысертацыю і ў 1983 г. стаў прафесарам кафедры тэорыі і гісторыі дзяржавы і права.
Іосіф Аляксандравіч Юхо – адзін з ініцыятараў стварэння часопіса “Спадчына” і член яго рэдакцыйнага савета.
Навуковая дзейнасць вучонага звязана з даследаваннем гісторыі беларускага народа, яго дзяржаўнасці, прававых інстытутаў. Ён з’яўляецца адным з аўтараў і перакладчыкаў энцыклапедычнага выдання “Статут Вялікага Княства Літоўскага 1588 г. Тэксты. Даведнік. Каментарыі” (1989). Даследчыкам падрыхтавана і надрукавана звыш 200 навуковых прац, у тым ліку 13 манаграфій і 16 вучэбных дапаможнікаў, у якіх адлюстроўваецца гісторыя беларускай дзяржаўнасці ад самых вытокаў да сучаснасці.
Шмат сіл і душэўнай цеплыні аддаваў прафесар падрыхтоўцы высокаадукаваных юрыстаў: двух дактароў і дзевяць кандыдатаў юрыдычных навук, аднаго кандыдата філасофскіх навук падрыхтаваў Іосіф Аляксандравіч.
Вялікі аўтарытэт І.А. Юхо быў прызнаны і ў працэсе яго работы ў Канстытуцыйнай камісіі па падрыхтоўцы праекта Канстытуцыі Рэспублікі Беларусь 1994 г.
Прафесар І.А. Юхо – лаўрэат прэміі імя У.І. Пічэты, узнагароджаны ордэнам Чырвонай Зоркі, Айчынай вайны І ступені, дзевяццю медалямі, у тым ліку медалём Францыска Скарыны.
Навуковая спадчына Іосіфа Аляксандравіча Юхо будзе яшчэ доўга ўплываць на развіццё юрыдычнай навукі ў ХХІ ст.
Экспазіцыя налічвае больш за 50 дакументаў: кніг, перыядычных выданняў, аўтарэфератаў дысертацый.
Выстаўка ўключае наступныя тэматычныя раздзелы:
- Бібліяграфія публікацый прафесара І.А. Юхо:
- манаграфіі, выданні, падрыхтаваныя ў суаўтарстве;
- падручнікі, навучальныя дапаможнікі і вучэбныя матэрыялы;
- артыкулы ў часопісах;
- артыкулы ў зборніках навуковых прац, дакладаў і тэзісаў канферэнцый.
- Матэрыялы па біяграфіі і літаратурнай спадчыне І.А. Юхо.
Выстаўка разлічана на шырокае кола чытачоў, якія цікавяцца жыццём і дзейнасцю прадстаўнікоў айчынай навукі.
Кантактны тэлефон: (8 017) 293 27 28.
Карысныя спасылкі