З 1 красавіка па 30 мая ў Нацыянальнай бібліятэцы Беларусі (3-ці паверх, кальцавы калідор) працуе выстаўка, прымеркаваная да Светлага Хрыстовага Уваскрэсення – свята Вялікадня.
Ужо першыя хрысціяне называлі Вялікдзень святам усіх свят, “вялікім днём Госпада”. Хрыстовае Уваскрэсенне – найвышэйшая праява ўсёмагутнасці Хрыста, сцвярджэнне веры і залог нашага ўваскрэсення. Велікоднае свята з’яўляецца сэнсавым цэнтрам не толькі царкоўнай абраднасці, але і ўсяго духоўнага жыцця хрысціянства.
На кніжнай выстаўцы “Праздниковъ праздникъ и торжество есть торжествъ” прадстаўлена каля 100 найноўшых кніг расійскіх і беларускіх выдавецтваў: Беларускага экзархата Рускай праваслаўнай царквы, Свята-Елісавецінскага манастыра, Свята-Петра-Паўлаўскага сабора, брацтва ў гонар Святога Архістратыга Міхаіла ў Мінску, Маскоўскай патрыярхіі Рускай праваслаўнай царквы, “Астрель”, “Белый город” і інш.
Экспазіцыя змяшчае энцыклапедыі, слоўнікі, даведнікі агульнахрысціянскай тэматыкі, кнігі пра храмы і манастыры, цудатворныя абразы, святыя мошчы і крыніцы, размешчаныя на тэрыторыі нашай краіны, пра існасць і сэнс хрысціянскага жыцця і ролю праваслаўя ў духоўным жыцці Беларусі, а таксама выданні для дзяцей па асновах праваслаўнай веры, правілах паводзін у храме і кнігі з тэкстамі малітваў.
Цэнтральнае месца займаюць выданні, якія непасрэдна датычацца свята Вялікадня, яго духоўнага сэнсу і значэння, царкоўнай абраднасці. Асобная ўвага нададзена велікоднай трапезе – традыцыйным стравам, іх сімволіцы, рэцэптам гатавання.
Выстаўка будзе цікавай не толькі для вернікаў, але і для ўсіх, хто жадае зразумець сутнасць і адчуць радасць светлага свята.
Кантактны тэлефон: (8 017) 293 28 86.