З 11 красавіка па 16 мая ў Нацыянальнай бібліятэцы Беларусі (2-гі паверх, кальцавы калідор) арганізавана выстаўка “Праздниковъ праздникъ и торжество есть торжествъ”, прымеркаваная да Светлага Хрыстовага Уваскрэсення – свята Вялікадня.
Царкоўны год – гэта чаргаванне будняў і свят. У будныя дні чалавек абавязаны працаваць, святы ж дадзены для таго, каб адчуць сябе вольным, падняцца над штодзённай мітуснёй, дакрануцца да вышэйшага свету.
Руская праваслаўная царква вылучае дванаццаць самых значных свят, якія адзначаюцца з асаблівай урачыстасцю і, па сваёй колькасці, называюцца двунадзясятымі Гасподнімі і Багародзічнымі. Навеяныя яны памяццю пра галоўныя падзеі евангельскай гісторыі і нясуць жывы ўспамін пра зямное жыццё Спасіцеля і Яго Прачыстай Мацеры. Асноўнае свята праваслаўя – Светлае Хрыстова Уваскрэсенне (Вялікдзень) – фармальна ў двунадзясяты цыкл не ўваходзіць, яно вышэйшае за ўсе святы: “Праздниковъ праздникъ и торжество есть торжествъ”, – як спяваецца падчас велікоднай службы.
Самае вялікае свята Вялікадня вылучаецца сярод іншых як найвышэйшая праява ўсемагутнасці Хрыста, сцвярджэнне веры і залог нашага ўваскрэсення. Велікодная ўрачыстасць з’яўляецца сэнсавым цэнтрам не толькі царкоўнай абраднасці, але і ўсяго духоўнага жыцця хрысціянства.
Нацыянальная бібліятэка Беларусі віншуе ўсіх з Вялікаднем і прапаноўвае сваім наведвальнікам і чытачам кніжна-ілюстрацыйную выстаўку “Праздниковъ праздникъ и торжество есть торжествъ”.
Значную частку экспазіцыі складаюць кнігі па гісторыі Рускай праваслаўнай царквы, энцыклапедыі праваслаўных свят, звесткі пра найбольш вядомыя праваслаўныя святыні (цэрквы і саборы, манастыры, цудатворныя абразы, святыя мошчы і крыніцы), размешчаныя на тэрыторыі Беларусі і за яе межамі, і кнігі па абрадавай кулінарыі.
Таксама святочная экспазіцыя знаёміць наведвальнікаў з аўтарскімі работамі майстроў народнай творчасці Каханоўскай Уладзіславы Маркаўны і Каханоўскай Інэсы Аляксандраўны. На выстаўцы прадстаўлены ручнікі, сурвэткі, абразы, выкананыя ў тэхніцы ручнога вышывання, пісанкі і распісаныя ўручную драўляныя гарлачы.
Кантактны тэлефон: 293-28-86.