Царкоўны год – гэта чаргаванне будняў і свят. У будні чалавек абавязаны працаваць, святы ж дадзены для таго, каб адчуць разняволенне, узняцца над штодзённай мітуснёй, датыкнуцца да вышэйшага свету.
Рускай праваслаўнай царквой выдзяляюцца дванаццаць самых значных і вялікіх свят, якія адзначаюцца з асаблівай урачыстасцю і, па сваёй колькасці, называюцца дванадзесятымі Гасподнімі і Багародзічнымі. Навеяны яны памяццю пра галоўныя падзеі евангельскай гісторыі і нясуць жывы ўспамін пра зямное жыццё Збавіцеля і Яго Прачыстай Маці. Асноўнае свята праваслаўя – Светлае Хрыстова Уваскрэсенне (Пасха) – фармальна ў дванадзесяты цыкл не ўваходзіць, яно вышэйшае за ўсе святы: «Праздниковъ праздникъ и торжество есть торжествъ», – як спяваецца ў час пасхальнага набажэнства. Найвялікшае свята Пасхі вылучаецца сярод іншых як найвышэйшае праяўленне ўсемагутнасці Хрыста, сцвярджэнне веры і залог нашага ўваскрэсення. Пасхальная ўрачыстасць з’яўляецца сэнсавым цэнтрам не толькі царкоўнай абраднасці, але і ўсяго духоўнага жыцця хрысціянства.
Нацыянальная бібліятэка Беларусі віншуе ўсіх з Вялікаднем і прапануе сваім наведвальнікам і чытачам тэматычную кніжную выстаўку, на якой прадстаўлена больш за 150 дакументаў з фондаў бібліятэкі. Значную частку экспазіцыі складаюць кнігі, што пабачылі свет у выдавецтве "Беларускі Экзархат". Гісторыя Рускай праваслаўнай царквы, энцыклапедыя праваслаўных свят, звесткі пра найбольш вядомыя праваслаўныя святыні (цэрквы і саборы, манастыры, цудатворныя іконы, святыя мошчы і крыніцы), размешчаныя на тэрыторыі Беларусі, а таксама за яе межамі, календары і малітвасловы, кнігі па абрадавай кулінарыі, фотаальбомы – усё гэта адлюстравана ў святочнай экспазіцыі. Выклікаюць цікавасць электронныя выданні: унікальны даведнік «Богословская энциклопедия» (змяшчае 6 600 артыкулаў), электронны аналаг бібліяграфічнага паказальніка «История раннего христианства» (Нацыянальная бібліятэка, 2004), які ўключае кнігі, выдадзеныя з 1800 па 1995 гг. на рускай і беларускай мовах.
Экспазіцыя размешчана на 2-м паверсе кальцавога калідора і будзе прадстаўлена да 20 мая.
Кантактны тэлефон: 293-28-86.
 |
 |
 |
 |
 |
 |
 |
 |
 |
