З 17 жніўня па 29 верасня ў зале беларускай літаратуры (пам. 205) праходзіць выстаўка “Праз пакуты – да шчасця”, прымеркаваная да 100-годдзя з дня нараджэння драматурга, празаіка, публіцыста Алеся Махнача (1922–2001).
Алесь (Аляксандр Іванавіч) Махнач належаў да таго пакалення пісьменнікаў, творчы і жыццёвы шлях якога склаўся пад уздзеяннем нялёгкіх, але гераічных падзей Вялікай Айчыннай вайны. У чэрвені 1941 г. удзельнічаў у абароне Брэсцкай крэпасці, быў цяжка паранены і ўзяты ў палон. Пасля вызвалення з канцэнтрацыйнага лагера ў 1945 г. знаходзіўся на лячэнні ў ваенных шпіталях, застаўся інвалідам.
Літаратурную дзейнасць А. Махнач пачынаў вершамі, аднаактовымі п’есамі. Пісаў пераважна для дзяцей, шмат увагі аддаваў асэнсаванню героікі Вялікай Айчыннай вайны. У творчым калейдаскопе пісьменніка – п'есы, сцэнкі, камедыі, скетчы, інтэрмедыі, драматычныя, празаічныя і вершаваныя творы, краязнаўчыя і публіцыстычныя нарысы. Некаторыя яго творы перакладаліся, ставіліся ў тэатрах, на беларускім радыё і тэлебачанні.
Экспазіцыя знаёміць з жанравай разнастайнасцю твораў пісьменніка. Многія з іх увайшлі ў зборнікі, некаторыя друкаваліся асобна або ў перыядычных выданнях. Да ўвагі наведвальнікаў – “Драматычныя мініяцюры”, “Да пары збан ваду носіць…”, “Усе ідуць у нагу”, “Мы будзем жыць”, “Дзеці крэпасці”, “Няхай красуе жыццё”, “Камандзір Усходняга форта”, з серыі “Ведаць свой край Беларусь” – краязнаўчыя нарысы “Нізок”, “Забалацце” і інш.
Асобны раздзел выстаўкі – матэрыялы пра жыццёвы і творчы шлях А. Махнача.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Час работы выстаўкі адпавядае рэжыму работы бібліятэкі.
Уваход – па чытацкім білеце ці білеце сацыякультурнага цэнтра.
Тэлефон для даведак: (8 017) 293 27 16.
Матэрыял пададзены аддзелам абслугоўвання спецыялізаванымі фондамі.
