З 4 кастрычніка па 30 лістапада ў Нацыянальнай бібліятэцы Беларусі (3-ці паверх, кальцавы калідор) арганізавана тэматычная кніжная выстаўка “Праз чытанне – да зорак!”, прымеркаваная да Сусветнага тыдня космасу.
З мэтай адзначыць уклад касмічнай навукі і касмічных тэхналогій у паляпшэнне дабрабыту чалавецтва Генеральная Асамблея ААН 6 снежня 1999 г. абвясціла тыдзень з 4 па 10 кастрычніка Сусветным тыднем космасу.
4 кастрычніка 1957 г. быў запушчаны першы штучны спадарожнік Зямлі. 10 кастрычніка 1967 г. уступіў ў сілу прыняты Генеральнай Асамблеяй ААН Дагавор пра прынцыпы дзейнасці дзяржаў па даследаванні і выкарыстанні касмічнай прасторы.
Шматлікія даброты цывілізацыі звязаны ў першую чаргу з космасам: касмічныя апараты зрабілі магчымым перадачу даных на велізарныя адлегласці, касмічныя тэхналогіі спарадзілі тысячы відаў прадукцыі, якая выкарыстоўваецца ў паўсядзённым жыцці, – ад звышлёгкіх матэрыялаў для вытворчасці красовак да сістэм штучнага дыхання.
Аднак космас – гэта яшчэ і бясконца таямнічыя прасторы Сусвету, загадкі і таямніцы якога людзі імкнуліся разгадаць з найстаражытнейшых часоў.
Нацыянальная бібліятэка Беларусі прапануе зазірнуць у бязмежныя касмічныя далячыні праз кнігі і атласы зорнага неба, навучыцца самастойна вызначаць сузор’і, пазнаць пра зоркі і планеты, туманнасці і галактыкі, пра “людзей космасу”, касмічныя караблі і сучаснае астранамічнае абсталяванне.
Экспазіцыя складаецца з 7 тэматычных частак і ўключае каля 300 дакументаў апошніх гадоў выдання. Гэта атласы, даведнікі, энцыклапедыі, падручнікі і навучальныя дапаможнікі, навукова-папулярныя матэрыялы.
Акрамя цікавай і пазнавальнай інфармацыі, на выстаўцы прадстаўлены ўзрушальныя сучасныя фотавыявы, атрыманыя з дапамогай касмічнага тэлескопа “Хабл” і магутных наземных тэлескопаў.
Выстаўка прызначана для шырокага кола чытачоў, “якія глядзяць у неба” і цікавяцца астраноміяй і касманаўтыкай.
Кантактны тэлефон: 293-29-80.
 |
 |
 |
 |
 |
 |
 |
 |
 |
