З 1 лістапада па 31 снежня ў зале прававой інфармацыі (пам. 207b) арганізавана выстаўка "Правы чалавека ў кантэксце права", прымеркаваная да Міжнароднага дня праў чалавека (10 снежня).
Генеральная Асамблея ААН, прымаючы 10 снежня 1948 г. Усеагульную дэкларацыю праў чалавека, заклікала ўсе дзяржавы да распаўсюджвання ведаў па правах чалавека шляхам асветы і адукацыі, павагі і ажыццяўлення на практыцы.
Міжнародны дзень праў чалавека нагадвае нам пра тое, што правы чалавека належаць у роўнай меры кожнаму з нас і звязваюць нас у адзіную сусветную супольнасць з аднолькавымі ідэаламі і каштоўнасцямі.
За час прыняцця Усеагульнай дэкларацыі праў чалавека ААН распрацавала ўсёабдымную стратэгію, накіраваную на дасягненне мэт у сферы праў чалавека. Асновай гэтай стратэгіі з’яўляецца збор міжнародных норм і стандартаў, якія сёння ахопліваюць кожную галіну чалавечай дзейнасці. На гэтай трывалай заканадаўчай аснове была створана шырокая сетка праваабарончых механізмаў, закліканых садзейнічаць будучаму развіццю міжнародных стандартаў і кантролю за іх ажыццяўленнем, іх захаванню і расследаванню парушэнняў праў чалавека.
Гэта стратэгія падмацоўваецца шырокім дыяпазонам розных відаў дзейнасці ў сферы грамадскай інфармацыі і праграмай тэхнічнага супрацоўніцтва, мэта якой заключаецца ў аказанні практычнай дапамогі дзяржавам у іх намаганнях заахвочваць і абараняць правы чалавека.
Рэспубліка Беларусь з’яўляецца аўтарам цэлага шэрагу ініцыятыў міжнароднага значэння ў сферы супрацьдзеяння парушэнням праў чалавека. Асаблівай увагі заслугоўвае ініцыятыва па актывізацыі дзейнасці ў барацьбе з гандлем людзьмі. У мэтах рэалізацыі міжнародных абавязкаў, прыняты комплекс мер, накіраваных на забеспячэнне ўсебаковай абароны праў дзяцей. Актыўны ўдзел наша краіна прымае і ў іншых формах міжнароднага супрацоўніцтва ў сферы праў чалавека.
Сучасны свет пад уздзеяннем працэсаў глабалізацыі, інтэграцыі і інфармацыі стаў больш узаемазвязаным і ўзаемазалежным. У гэтых умовах правы чалавека з’яўляюцца своеасаблівай прызмай, скрозь якую разглядаюцца, ацэньваюцца і ўспрымаюцца ўсе краіны, правы чалавека ператвараюцца ва ўніверсальны крытэрый палітычнага, сацыяльна-эканамічнага і духоўнага развіцця сучаснага грамадства.
Экспазіцыя налічвае больш за 60 дакументаў: кнігі, брашуры, перыядычныя выданні, аўтарэфераты дысертацый.
Выстаўка ўключае наступныя тэматычныя раздзелы:
- Правы чалавека ў міжнародным праве: стан, рэалізацыя, праблемы.
- Канстытуцыя як гарант рэалізацыі праў чалавека ў сучасным свеце.
- Канстытуцыйна-працэсуальныя сродкі абароны праў і свабод чалавека і грамадзяніна.
- Дзяржаўна-прававы механізм абароны грамадзянскіх праў і свабод чалавека ў Рэспубліцы Беларусь.
Выстаўка разлічана на ўсіх, хто займаецца тэарэтычнымі і практычнымі праблемамі ў сферы міжнароднага, канстытуцыйнага, сацыяльнага і іншых праў.
Кантактны тэлефон: (8 017) 293 27 28.
 |
 |
 |
