З 9 студзеня па 26 сакавіка ў зале прававой інфармацыі (пам. 207b) адкрыта выстаўка “Прававое рэгуляванне сямейных адносін”, прымеркаваная да 90-годдзя прыняцця Кодэкса аб шлюбе і сям'і Беларускай ССР.
27 студзеня 1927 г. сесія ЦВК БССР прыняла Кодэкс законаў аб шлюбе, сям’і і апецы БССР, уведзены ў дзеянне з 1 сакавіка гэтага ж года.
Кодэкс дзяліўся на чатыры раздзелы: шлюб, сям’я, усынаўленне, апека і апякунства.
У параўнанні з заканадаўствам першых гадоў Савецкай улады кодэксам замацоўваліся некаторыя новыя палажэнні. Шлюбны ўзрост быў павышаны з 16 да 18 гадоў. Кодэкс прадугледжваў аднолькавыя юрыдычныя наступствы як зарэгістраванага, так і фактычнага шлюбу. Не дапускаліся шлюбы паміж пазашлюбнымі сваякамі, апекуном і падапечным, усынавіцелем і ўсыноўленым. Новы кодэкс замацаваў агульнасць маёмасці, нажытай мужам і жонкай падчас шлюбу, і ўстанавіў прынцып роўнасці іх долі ў гэтай маёмасці. Праца па вядзенні дамашняй гаспадаркі і доглядзе дзяцей прыраўноўвалася да працы па здабыванні сродкаў для жыцця. Кодэкс падрабязна рэгламентаваў парадак судовага ўстанаўлення пазашлюбнага бацькоўства.
У адрозненне ад заканадаўства, якое дзейнічала раней і не дапускала ўсынаўлення, КЗаШСА БССР прадугледжваў усынаўленне.
Сямейнае заканадаўства такога зместу дзейнічала на тэрыторыі краіны да 1968 г., калі былі прыняты Асновы заканадаўства Саюза ССР і саюзных рэспублік аб шлюбе і сям’і. На іх падставе ва ўсіх саюзных рэспубліках былі прыняты кодэксы аб шлюбе і сям’і. На тэрыторыі БССР Кодэкс аб шлюбе і сям’і быў уведзены ў дзеянне з 1 лістапада 1969 г.
У большасці кодэксы саюзных рэспублік, у тым ліку і РСФСР, змяшчалі ідэнтычныя нормы Асноў заканадаўства Саюза ССР і саюзных рэспублік аб шлюбе і сям’і. Варта адзначыць, што кодэксы саюзных рэспублік былі вельмі падобныя паміж сабой, а калі мелі разыходжанні, то яны былі малазначныя.
Сёння нарматыўным актам, які найбольш поўна рэгулюе сямейныя адносіны, з’яўляецца Кодэкс Рэспублікі Беларусь аб шлюбе і сям’і, што ўступіў у дзеянне 1 верасня 1999 года. Да крыніц сямейнага права адносяцца таксама ўказы і распараджэнні прэзідэнта , пастановы ўрада, іншыя падзаконныя акты, якія рэгулююць сямейныя адносіны. У адпаведнасці з артыкулам 7 Кодэкса Рэспублікі Беларусь аб шлюбе і сям’і, грамадзянскае, жыллёвае і іншае заканадаўства прымяняецца да сямейных адносін толькі ў выпадку адсутнасці рэгулявання гэтых адносін заканадаўствам аб шлюбе і сям’і.
Экспазіцыя налічвае звыш 50 дакументаў: кнігі, брашуры, перыядычныя выданні, аўтарэфераты дысертацый.
Выстаўка ўключае наступныя тэматычныя раздзелы:
- Гісторыя станаўлення і развіцця заканадаўства аб шлюбе і сям’і ў Беларусі.
- Нацыянальнае сямейна-прававое рэгуляванне ў Рэспубліцы Беларусь.
- Парадак заключэння і падстава спынення шлюбу.
- Аліментныя абавязацельствы.
Рэкамендуецца навуковым работнікам, выкладчыкам, аспірантам і студэнтам юрыдычных ВНУ, а таксама ўсім, хто цікавіцца сямейным правам.
Кантактны тэлефон: (8 017) 293 27 28.