З 9 кастрычніка па 10 лістапада ў зале дакументаў па мастацтве (пам. 306) праходзіць кніжна-ілюстрацыйная выстаўка “Прагулкі па Усходняй сталіцы”, прысвечаная 255-годдзю з дня нараджэння японскага мастака Кацусіка Хакусая.
Выдатны прадстаўнік школы ўкіё-э, майстар каляровай ксілаграфіі Кацусіка Хакусай (1760–1849) жыў і працаваў у горадзе Эдо (цяперашні Токіа) – так званай усходняй сталіцы Японіі. З’яўляючыся надзвычай упартым і патрабавальным да сябе, фарміруючы ўласны стыль у мастацтве, ён змяніў каля 50 псеўданімаў, але ў выніку спыніўся на самым вядомым – Кацусіка Хакусай, што азначае “мастак, апантаны малюнкам”. Спасцігшы складаную і працаёмкую працу гравёра, Хакусай стаў родапачынальнікам і непераўзыдзеным майстрам фукэй-га – пейзажнага жанру японскай гравюры, звярнуўшыся да якога апяваў паэтычныя вобразы Краіны ўзыходзячага сонца.
Творчасць Хакусая надзвычай шматгранная, самабытная і ўнікальная. Мастак ствараў тэатральныя афішы і партрэты акцёраў тэатра Кабукі, маляўнічыя карціны-скруткі, віншавальныя паштоўкі сурымона, ілюстрацыі да літаратурных твораў, шматлікія серыі гравюр. Яго працам уласцівая філасофская глыбіня і ўсходняя мудрасць, яны захапляюць і зачароўваюць яркімі фарбамі, дэкаратыўнасцю, адважнымі перспектыўнымі эфектамі, высокім графічным майстэрствам, багаццем і тонкасцю каларыстычнага рашэння, кантрастамі паміж мітуслівай дзейнасцю людзей і абыякавым спакоем прыроды.
Сярод дакументаў, што экспануюцца на выстаўцы, прадстаўлены рэпрадукцыі пейзажаў з лепшых графічных серый майстра, у прыватнасці, “Трыццаць шэсць відаў гары Фудзі”, “Вандраванне па вадаспадах розных правінцый”, “Віды выдатных мастоў…”, “Вялікія кветкі”, “Паэты Кітая і Японіі”, “Сто гісторый аб прывідах”.
Асаблівую ўвагу прыцягнуць кнігі даследчыка творчасці японскага графіка Б.Г. Воранавай, аповесць П. Бялецкага “Апантаны малюнкам” (“Одержимый рисунком”), а таксама знакаміты зборнік малюнкаў “Манга” (“Кніга накідаў”) (“Манга” (“Книга набросков”)), дзе сабраны разнастайныя замалёўкі мастака, якія з’яўляюцца сапраўднай энцыклапедыяй жыцця японскага народа.
Усяго на выстаўцы прадстаўлена каля 30 дакументаў, сярод якіх кнігі, паштоўкі, альбомы рэпрадукцый, каталогі выставак.
Кантактны тэлефон: (8 017) 293 27 53.
 |
 |
 |
 |
 |
 |
 |
 |
 |
