З 13 па 26 кастрычніка ў зале беларускай літаратуры (пам. 205) праходзіць кніжная выстаўка “Пісьменнік краіны маленства”, прысвечаная 60-годдзю з дня нараджэння беларускага пісьменніка і драматурга Аляксея Мікалаевіча Якімовіча.
А. Якімовіч жыве і працуе ў Слоніме. Першую аповесць для падлеткаў “Гордзіеў вузел, альбо Нявыдуманыя гісторыі з жыцця Алеся Пятрашкі” выдаў у 1987 г. На творчым рахунку аўтара шэраг кніг для дзяцей і падлеткаў – “Эльдарада просіць дапамогі”, “Залатая дзіда”, “Сакрэт Тунгускага метэарыта”, “Пастка для пярэваратня”, а таксама п’есы – “Аварыйная пасадка, або Першы дыназаўрык”, ”Добры змей” і інш. Творы пісьменніка знаёмяць юнага чытача з беларускай гісторыяй, падзеямі XIV ст. Казачныя, прыгодніцкія і фантастычныя сюжэты закранаюць экалагічныя праблемы, расказваюць пра школьнае жыццё. Пры ўсёй жанравай і тэматычнай разнастайнасці яны насычаны пазнавальным зместам, які пашырае кругагляд і нясе чытачу новыя веды.
Апошнім часам А.М. Якімовіч звярнуўся да п’ес для дарослага гледача (“Муляж”, “Сын прыехаў”, ”Загадкавы храм”). Прэм’ера адной з іх – “Спакуса” – адбылася ў Дзяржаўным драматычным тэатры Слоніма. На гэтай сцэне паспяхова ідуць п’есы-казкі, створаныя драматургам для дзяцей.
На выстаўцы прадстаўлены выданні твораў А.М. Якімовіча – плён 20-гадовай працы пісьменніка і драматурга, а таксама матэрыялы пра жыццё і творчы лёс юбіляра.
Кантактны тэлефон: 293-27-16.