З 21 верасня па 10 кастрычніка ў зале беларускай літаратуры (пам. 205) праходзіць выстаўка “Першыя кветкі”, прысвечаная 120-годдзю з дня нараджэння беларускай пісьменніцы Зоські Верас (1892–1991).
Зоська Верас – вядомы псеўданім Людвікі Антонаўны Сівіцкай. Творчая спадчына пісьменніцы, публіцыста, мемуарыста, выдаўца, грамадска-культурнага дзеяча – гэта вершы, апавяданні, шматлікія артыкулы па сельскай гаспадарцы і педагогіцы. Ужо ў юнацкія гады яна брала ўдзел у арганізацыі і дзейнасці Гродзенскага гуртка беларускай моладзі, члены якога ставілі сваёй мэтай развіццё нацыянальна-патрыятычнай самасвядомасці народных мас. Зоська Верас была асабіста знаёма з М. Багдановічам, М. Гарэцкім, З. Бядулем, У. Галубком, Ядвігіным Ш. і іншымі вядомымі дзеячамі беларускай культуры. Яна заснавала, выдавала і рэдагавала папулярныя часопісы для дзяцей “Заранка” і “Пралескі”, была выдаўцом спецыялізаванага часопіса “Беларуская борць” і інш.
Экспазіцыя складаецца з двух раздзелаў. Першы раздзел выстаўкі “Верасовыя лісты” прысвечаны творчасці пісьменніцы. Увагу наведвальнікаў выстаўкі прывабіць невялікая кніжка – “Беларуска-польска-расейска-лацінскі батанічны слоўнік”, выдадзены З. Верас у 1924 г. у Вільні. Сярод экспанатаў – зборнік вершаў і апавяданняў пісьменніцы “Каласкі” (1985). Аснову экспазіцыі склалі паэтычныя творы аўтара, якія друкаваліся ў часопісах даваеннага і пасляваеннага часу: “Саха”, “Заранка”, “Студэнцкая думка”, “Шлях моладзі”, “Полымя”, “Роднае слова”, “Работніца і сялянка” і інш. У раздзеле таксама прадстаўлена перапіска пісьменніцы з Н. Ватацы, А. Бачылам, В. Скалабанам.
Другі раздзел экспазіцыі “Гаспадыня лясной хаткі” змяшчае энцыклапедычныя выданні з артыкуламі пра З. Верас, успаміны аб сустрэчах і знаёмстве з ёю, а таксама вершы У. Скарынкіна, Р. Барадуліна і В. Шніпа, прысвечаныя пісьменніцы.
Кантактны тэлефон: (8 017) 293 27 16.
 |
 |
 |
 |
 |
 |
