З 5 мая па 12 чэрвеня ў зале дакументаў па мастацтве (пам. 306) праходзіць кніжна-ілюстрацыйная выстава “Пэндзлем ствараючы казкі”, прысвечаная 175-годдзю з дня нараджэння рускага мастака Віктара Міхайлавіча Васняцова (1848–1926).
Віктар Васняцоў – найбуйнейшы жывапісец рамантычнага кірунку, які праславіўся ў гісторыка-фальклорнай тэматыцы. Яго імя і карціны вядомы кожнаму. Мастацкую каштоўнасць твораў Васняцова немагчыма пераацаніць. Ён быў у ліку першых, хто на сваіх палотнах ажывіў чароўны свет казак, былін і фальклору. Талент майстра таксама выявіўся ў самых разнастайных сферах мастацтва – у манументальным жывапісе, архітэктуры, тэатральнай дэкарацыі і многіх іншых відах мастацкай творчасці.
Творы Васняцова прасякнуты народным духам і глыбокім, шчырым настроем. Яны самабытныя і арыгінальныя. Магутныя “Волаты”, сумная “Алёнушка”, “Іван-царэвіч на Шэрым ваўку”, “Спячая царэўна”, “Віцязь на ростанях” і многія іншыя рэпрадукцыі карцін, прадстаўленыя на выставе, уводзяць нас у свет рускіх казак, міфаў, былін і запамінаюцца на ўсё жыццё.
Самым грандыёзным і значным творам Васняцова сталі яго “Волаты” – карціна, над якой мастак з перапынкамі працаваў на працягу дваццаці пяці гадоў. Шырокафарматная рэпрадукцыя гэтай працы, якая займае цэнтральнае месца экспазіцыі, валодае дзіўна якаснай колераперадачай і насычанай палітрай, нягледзячы на 1950 год выдання.
Пакінуўшы прозу быту дзеля паэзіі мроі і мары, тонка адчуваючы натуральную прыгажосць прыроды, Васняцоў у сваіх работах здолеў напоўніць пейзаж казачнай адухоўленасцю. Наведвальнік зможа ў гэтым пераканацца, гледзячы на рэпрадукцыю знакамітай “Алёнушкі”. Мелодыя суму адклікаецца ў пейзажы: намаляваныя на фоне цёмнага ельніку трапяткія асіны, быццам спачуваючы адзінокай гераіні, раняюць у вір, як слёзы, пазалочаныя восенню лісткі / лісцікі.
Здольнасць Васняцова перадаць прыгажосць і ўзвышанасць народнай фантазіі прынесла яго творам шырокую папулярнасць і нязменную любоў гледачоў. На выставе сярод экспазіцыйнага матэрыялу наведвальнік знойдзе размаляваную шкатулку. Адчыніўшы яе, можна выбраць для сябе добразычлівае казачнае прадказанне.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 53.
Матэрыял пададзены аддзелам абслугоўвання спецыялізаванымі фондамі.
