З 16 мая па 16 чэрвеня ў зале выяўленчых і відэадакументаў (пам. 307) праходзіць выстаўка “Паэзія родных прастораў”, прысвечаная 110-годдзю з дня нараджэння рускага жывапісца, майстра лірычнага пейзажа М.М. Рамадзіна (1903–1987).
“Карціны Рамадзіна неад’емныя ад прыроды. Яны – жывыя яе часткі. Ад гэтых карцін можна скалець на ветры, удыхаць усімі грудзьмі вясенні рачны халадок, прамакаць наскрозь ад дажджу, адчуць пах хваёвай перагрэтай ігліцы”, – так пісаў К.Г. Паўстоўскі пра сутнасць пейзажнай творчасці аднаго з выдатнейшых майстроў савецкага мастацтва.
Зрабіць свет, увасоблены на палатне, жывым, трапяткім – задача, ад рашэння якой у канчатковым рахунку залежыць творчы поспех жывапісца, мастацтва якога прасякнута пафасам сцвярджэння бясконцай прыгажосці рэальнага свету. Для гэтага недастаткова пратакольна дакладна перанесці на палатно пейзажны матыў, бо карціна ператворыцца ва ўнутрана пусты муляж. Барацьбой супраць такога сухога, абыякавага капіравання натуры, змаганнем за паэтычнае і адухоўленае стаўленне да яе характарызуецца ўвесь творчы шлях Мікалая Міхайлавіча Рамадзіна.
Прадстаўленыя ў экспазіцыі рэпрадукцыі работ мастака дазваляюць гледачу адчуць эфект прысутнасці прыроды і пагрузіцца ў яе дзівосны, чароўны свет. Палотны майстра “Рака Царэўна”, “Вясна”, “Вербы ў паводку”, “Вясновы дзень” перадаюць рамантыку абнаўлення, дыханне свежасці ў вясновых токах зямлі, размаху паводкі, дзе стаяць прыбярэжныя дрэвы, а паветра празрыстае і чыстае. Карціны “Кержанец”, “Рака Славянка”, “Затоплены лес”, “Лясная глуш”, “Лясное возера” адкрываюць меладычную казку ціхіх лясных азёр і былінную цвярдыню глухіх хваёвых бароў, дзе ўжо “не лес, а цэлы свет рознастаронні, напоўнены зданнямі і цудамі”.
Усяго на выстаўцы экспануецца каля 80 дакументаў, якія найбольш яскрава адлюстроўваюць творчасць М. Рамадзіна. Сярод іх – альбомы, часопісы, паштоўкі, рэпрадукцыі, даведачныя выданні.
Экспазіцыя разлічана на ўсе катэгорыі чытачоў, якія цікавяцца пейзажным жывапісам і савецкім мастацтвам.
Кантактны тэлефон: (8 017) 293 27 58.
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
