З 30 верасня па 7 лістапада ў зале дакументаў па мастацтве (пам. 306) праходзіць кніжна-ілюстрацыйная выстава “Пад знакам крылатага змея”, прысвечаная 550-годдзю з дня нараджэння Лукаса Кранаха Старэйшага (1472–1553).
Нямецкі жывапісец Лукас Кранах Старэйшы – адзін з самых знакамітых майстроў свайго часу. Творчасць мастака аказала вялікі ўплыў на развіццё еўрапейскага жывапісу. Кранах прарабіў складаную эвалюцыю, якая азнаменавала пераход ад ідэалаў Рэнесансу да рафінаванай вытанчанасці і змястоўнай мудрагелістасці маньерызму.
Экспазіцыя дэманструе маштаб творчай асобы славутага жывапісца і элегантнасць непаўторнага “кранахаўскага стылю”. Тэматыка твораў выставы вельмі разнастайная: рэлігійныя вобразы суседнічаюць з міфалагічнымі, партрэты – з жанравымі сцэнамі павучальнага зместу і карцінамі, у якіх галоўнае месца займае адлюстраванне прыроды. Амаль на ўсіх жывапісных палотнах і гравюрах майстар змяшчаў уласную манаграму – маленькага крылатага змея.
Упрыгажэннем экспазіцыі сталі рэпрадукцыі карцін “Жаночы партрэт”, “Партрэт прынцэсы Сібілы Клеве”, “Мадонна з Немаўлём пад яблыняй” і многія іншыя працы з прывабнымі жаночымі вобразамі. Незвычайна індывідуальны кранахаўскі тып жаночай прыгажосці – ледзь скуласты твар з маленькім завостраным падбародкам і падоўжаным разрэзам вачэй. На выставе аблічча залатакудрай прыгажуні з вузкімі раскосымі вачамі можна ўбачыць і ў партрэтах, і ў сюжэтах антычнай міфалогіі, і ў карцінах на біблейскія тэмы.
Творчы шлях Кранаха адлюстроўвае лёс нямецкага жывапісу эпохі Рэфармацыі. Пратэстанцкія сімпатыі мастака і яго сяброўства з Марцінам Лютэрам адбіліся ў шматлікіх партрэтах Лютэра, частка з якіх прадстаўлена на выставе.
Сабраныя разам кнігі, альбомы, паштоўкі, рэпрадукцыі і часопісныя артыкулы ва ўсім бляску паказваюць майстэрства і талент яркага прадстаўніка нямецкага Адраджэння і маньерызму.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 53.
Матэрыял пададзены аддзелам абслугоўвання спецыялізаванымі фондамі.