ГалоўнаяНавіныКніжныя выстаўкі
Візіт у Дзяржаўную бібліятэку Берліна
Музей, Дняпро і родная хата

Пад небам памяці і слова

Пад небам памяці і слова
Іншыя навіны

З 2 па 31 снежня ў зале беларускай літаратуры (пам. 205) праходзіць выстаўка “Пад небам памяці і слова”, прысвечаная 80-годдзю з дня нараджэння беларускага пісьменніка, публіцыста, драматурга, грамадскага дзеяча І. Чыгрынава (1934–1996).


Творчасць народнага пісьменніка Беларусі (1994), лаўрэата Дзяржаўнай прэміі БССР (1974), Літаратурнай прэміі імя А. Фадзеева (1979) Івана Гаўрылавіча Чыгрынава стала ў беларускай літаратуры ХХ ст. яркай старонкай, у якую майстар слова ўпісаў цыкл раманаў пра Вялікую Айчынную вайну, кнігі апавяданняў і публіцыстыкі, гістарычныя драмы і п’есы.

У невычэрпнай для беларускай літаратуры тэме Вялікай Айчыннай вайны, вядучай у творчасці цэлага шэрага пісьменнікаў, І. Чыгрынаў у раманах “Плач перапёлкі” (1970), “Апраўданне крыві” (1976), “Свае і чужынцы” (1983), “Вяртанне да віны” (1992), “Не ўсе мы згінем” (1996) сказаў не толькі сваё адметнае слова, але выступіў наватарам. Як адзначыў пісьменнік А. Кудравец: “…наватарства І. Чыгрынава праявілася ў яго лепшым рамане «Плач перапёлкі», у якім ружовы рамантызм літаратурнай партызаншчыны ...саступіў месца глыбокай бытавой трагедыі народа, якога кінулі ў пекла вайны...”.

Пасля эпапеі пра вайну І. Чыгрынаў ужо як драматург звярнуўся да гісторыі, вынікам чаго сталі гістарычныя драмы “Следчая справа Вашчылы” (1988), “Звон – не малітва” (1988), “Ігракі” (1990), “Прымак” (1994), “Зайграй, хлопча малы” (1995) і інш.

Іван Чыгрынаў вядомы таксама як кінасцэнарыст, суаўтар сцэнарыя тэлефільма “Руіны страляюць…” (1970, разам з І. Новікавым; адзначаны Дзяржаўнай прэміяй БССР).

Юбілейная экспазіцыя адкрываецца раздзелам “Раманіст, драматург, апавядальнік, публіцыст”. У ім прадстаўлены кніжныя выданні; часопісы з першымі публікацыямі твораў І. Чыгрынава; выбраныя выданні, у тым ліку “Выбраныя творы” серыі “Бібліятэка Саюза пісьменнікаў Беларусі” (2006) і серыі “Беларускі кнігазбор” (2013); зборнікі апавяданняў, што выходзілі ў расійскіх выдавецтвах “Советский писатель”, “Художественная литература”, “Известия”, “Воениздат”; творы на беларускай, рускай, балгарскай, нямецкай, латышскай, малдаўскай мовах; зборнікі літаратурна-крытычных артыкулаў, публіцыстыкі і дзённікавых нататкаў (“Паміж сонцам і месяцам”, “Новае ў жыцці, новае ў літаратуры”), а таксама нарыс пра жыццё і дзейнасць дзеяча беларускай культуры М. Нікіфароўскага “Николай Яковлевич Никифоровский” (1960), напісаны ў суаўтарстве з В. Бандарчыкам.

Раздзел “Мастацкі свет Івана Чыгрынава” прадстаўляе матэрыялы, якія ўводзяць у лабараторыю пісьменніка, раскрываюць унутраны свет аўтара і яго герояў. Тут размешчаны артыкулы, водгукі і развагі пра творчасць пісьменніка, якія зрабілі крытыкі і літаратуразнаўцы. Сярод аўтараў – Д. Бугаёў, А. Марціновіч, В. Смаль, Н. Еўчык і інш. Раздзел таксама ўключае шэраг энцыклапедычна-даведачных выданняў, якія ўтрымліваюць біяграфічныя звесткі пра І. Чыгрынава.

Усяго на выстаўцы экспануецца звыш 130 выданняў.

Кантактны тэлефон: (8 017) 293 27 16.

Навіны

Віртуальная чытальная зала прадстаўляе інфармацыйны рэсурс пра выдатнага ўраджэнца Беларусі

27 Сак 2020

Рэпертуар персанальных краязнаўчых рэсурсаў арганізацый – партнёраў Нацыянальнай бібліятэкі Беларусі папоўніўся віртуальным праектам “Жарэс Алфёраў: чалавек-легенда”.

Навіны Нацыянальнай бібліятэкі Беларусі

30 сакавіка 1945 года. 41 дзень да Перамогі

30 Сак 2020

Узяцце Данцыга (Гданьска) і лісты-падзякі з Польскай рэспублікі. Падрыхтоўка тарфянікаў да сезону. Папаўненне ў Беларускім дзяржаўным музеі гісторыі Вялікай Айчыннай вайны. Дыспут у чытальнай зале бібліятэкі Дома партыйнай асветы. Газеты: “Звязда” (№№ 58, 59), “Советская Белоруссия” (№№ 57, 58, 60), “Совецкая радзіма” (№ 49).

Праект “100 дзён да Вялікай Перамогі. Па старонках беларускіх газет 1945 г.”

29 сакавіка 1945 года. 42 дні да Перамогі

29 Сак 2020

У зводцы Саўінфармбюро. Рабочы план на пасяўную. Бібліятэкі Воранаўскага раёна. Газеты: “Ленінскі шлях” Горацкага раёна (№ 23), “Путь соціалізма” Воранаўскага раёна (№ 20).

Праект “100 дзён да Вялікай Перамогі. Па старонках беларускіх газет 1945 г.”

28 сакавіка 1945 года. 43 дні да Перамогі

28 Сак 2020

Узятыя Штрэлен і Рыбнік. Фаўстпатроны у Рыбніку. Заява Эйзенхаўэра. У Акадэміі навук БССР. Ганусаўская доследная станцыя. Газеты: “Звязда” (№ 57), “Советская Белоруссия” (№ 56).

Праект “100 дзён да Вялікай Перамогі. Па старонках беларускіх газет 1945 г.”

111