Да 25-годдзя ўстанаўлення дыпламатычных адносін паміж Рэспублікай Беларусь і Кітайскай Народнай Рэспублікай Нацыянальная бібліятэка Беларусі падрыхтавала кніжную выстаўку "Пад крыламі дракона".
У экспазіцыі прадстаўлена больш за 300 выданняў на беларускай, рускай, кітайскай і англійскай мовах за апошнія пяць гадоў, прысвечаных гісторыі Кітая ад старажытнасці да нашых дзён, мудрасці кітайскай паэзіі, выдатным асобам, духоўнай культуры, старажытнай і сучаснай архітэктуры, выяўленчым і музычным мастацтвам, навуковым і эканамічным дасягненням Кітайскай Народнай Рэспублікі.
Гісторыя – гэта карані будучыні, таму экспазіцыя пачынаецца менавіта з гісторыі. У першай частцы сабраны разнастайныя па форме і стылі выкладання матэрыялу выданні. Сур’ёзныя навуковыя і вучэбныя кнігі, зборнікі прац, манаграфіі, заснаваныя на арыгінальных гістарычных даследаваннях расійскіх, кітайскіх і заходніх вучоных, будуць карысныя беларускім навуковым даследчыкам, выкладчыкам, студэнтам.
Займальнае выкладанне поўнага і падрабязнага апісання гісторыі Паднябеснай – ад ранняга палеаліту да ХХ стагоддзя, арыгінальная і даступная форма кароткіх ілюстраваных эсэ робяць навукова-папулярныя кнігі цікавымі для самага шырокага кола чытачоў.
Гістарычная частка экспазіцыі не абыходзіць увагай трактаты пра славутыя баявыя майстэрствы, вучэнне старажытнакітайскага філосафа і асветніка Канфуцыя, святы, норавы, звычаі, традыцыі, побыт і нацыянальныя стравы кітайцаў.
Сучасны Кітай прадстаўлены на выстаўцы шэрагам самых новых выданняў аб дзяржаўным кіраванні і лідары кітайскай нацыі Сі Цзіньпіне, унутранай і знешняй палітыцы, нацыянальнай абароне, народанасельніцтве і нацыянальнасцях Кітая, навуковых і тэхнічных дасягненнях, прыродных рэсурсах, эканамічным стане, культуры і мастацтве Кітайскай Народнай Рэспублікі.
Шырокай аўдыторыі чытачоў прапанаваны шматлікія энцыклапедыі пра Кітай, папулярныя кніжныя серыі Міжкантынентальнага выдавецтва Кітая "Основные сведения о Китае" і "Духовная культура Китая".
Цэнтрам экспазіцыі стаў раздзел, прысвечаны беларуска-кітайскім адносінам. Заслугоўваюць асаблівай увагі кнігі "Беларусь глазами китайцев" і "Китай глазами белорусов", у якіх дзяржаўныя служачыя, бізнес-кіраўнікі, вучоныя, журналісты пішуць пра свае асабістыя назіранні і ўражанні ад краін, што назаўсёды засталіся ў душы і памяці. Тэма асабістых уражанняў працягваецца ў новым выдавецкім праекце Анатолія Афанасьевіча Тозіка, дырэктара Рэспубліканскага інстытута кітаязнаўства імя Канфуцыя БДУ, Надзвычайнага і Паўнамоцнага Пасла Рэспублікі Беларусь у КНР (2006–2010 гг.), "Белорусско-китайские отношения в воспоминаниях белорусских послов".
На выстаўцы прадстаўлены: кніжная серыя "Светлыя знакі: паэты Кітая", паэтычны зборнік "Сто избранных лирик" самага знакамітага кітайскага паэта Лі Бая ў перакладзе вядомага ў нашай краіне філолага, каліграфа і мастака Лі Цзо, беларускамоўны зборнік кітайскай паэзіі і прозы розных эпох "Стагоддзе на знаёмства", выключны па мастацкім аздабленні і падбору твораў ста самых адметных кітайскіх паэтаў ад старажытнасці да ХХ стагоддзя зборнік "Пад крыламі дракона".
Чвэрць стагоддзя дыпламаты, палітыкі, фінансісты, прамыслоўцы, ваенныя, прадстаўнікі навукі, адукацыі, культуры і мастацтва дзвюх краін дэманструюць лепшыя дасягненні ў сваіх сферах дзейнасці для развіцця паспяховага ўзаемавыгаднага супрацоўніцтва Рэспублікі Беларусь і Кітайскай Народнай Рэспублікі.
Спадзяёмся, гэта выстаўка таксама зробіць свой уклад у далейшае ўмацаванне дружбы і развіццё культурна-асветніцкага супрацоўніцтва нашых краін.
Кантактны тэлефон: (8 017) 293 29 80.