З 5 студзеня па 16 лютага ў зале дакументаў міжнародных арганізацый (пам. 207g) адкрыта выстаўка “Пад флагам Сусветнай гандлёвай арганізацыі к развіццю сусветнага гандлю”.
Выстаўка прысвечана 15-годдзю Сусветнай гандлёвай арганізацыі (СГА) – міжнароднай эканамічнай арганізацыі, якая займаецца пытаннямі шматбаковага рэгулявання гандлю (таварамі, паслугамі і інтэлектуальнай уласнасцю).
СГА з’яўляецца пераемніцай Генеральнага пагаднення па тарыфах і гандлі (ГАТТ), якое было заключана ў 1947 годзе і на працягу амаль 50 гадоў фактычна выконвала функцыі міжнароднай арганізацыі. ГАТТ паклала пачатак лібералізацыі гандлю шляхам зніжэння імпартных мытных падаткаў. Пагадненне рэгулявала толькі гандаль таварамі, сфера дзейнасці СГА больш шырокая: акрамя гандлю таварамі, яна рэгулюе таксама гандаль паслугамі і гандлёвыя аспекты праў інтэлектуальнай уласнасці.
Афіцыйнай датай утварэння СГА з’яўляецца 1 студзеня 1995 года. У адпаведнасці з Пагадненнем аб заснаванні СГА, якое было падпісана 15 красавіка 1994 года, краінамі – заснавальніцамі арганізацыі сталі ўсе браўшыя ўдзел у перамовах стораны – удзельніцы ГАТТ (на той момант – 125 дзяржаў).
На сёняшні час членамі СГА з’яўляюцца 153 дзяржавы. Яшчэ 27 дзяржаў маюць статус наглядальніка СГА. Большасць з іх, у тым ліку Рэспубліка Беларусь (статус наглядальніка – з 1993 года), вядуць перамовы аб далучэнні да гэтай арганізацыі.
Галоўная задача СГА – садзейнічаць бесперашкоднаму міжнароднаму гандлю, паколькі менавіта эканамічная свабода ў гэтай галіне садзейнічае росту і павышэнню дабрабыту ўсяго грамадства.
Асноўнымі функцыямі СГА з’яўляюцца:
- кантроль за выкананнем патрабаванняў базавых пагадненняў СГА;
- стварэнне ўмоў для перамоў паміж краінамі – удзельніцамі СГА;
- рэгуляванне спрэчак паміж дзяржавамі па праблемах знешнеэканамічнай гандлёвай палітыкі;
- кантроль за палітыкай дзяржаў – членаў СГА ў галіне міжнароднага гандлю;
- аказанне дапамогі краінам, якія развіваюцца;
- супрацоўніцтва з іншымі міжнароднымі арганізацыямі.
У аснове дзейнасці СГА ляжаць тры міжнародныя пагадненні, падпісаныя большасцю дзяржаў, якія актыўна ўдзельнічаюць у светагаспадарчых адносінах: Генеральнае пагадненне аб гандлі таварамі (ГАТТ), Генеральнае пагадненне аб гандлі паслугамі (ГАТС) і Пагадненне аб гандлёвых аспектах праў інтэлектуальнай уласнасці (ТРІПС). Асноўная мэта гэтых пагадненняў – аказваць дапамогу прадпрыемствам усіх краін, якія займаюцца экспартна-імпартнымі аперацыямі.
Cёння шматбаковыя гандлёвыя пагадненні ГАТТ/СГА выкарыстоўваюцца як аснова рэгулявання экспартна-імпартных узаемасувязей больш за 150 краін. Яны з’яўляюцца таксама арыенцірам для распрацоўкі і практычнага прымянення нацыянальных заканадаўчых і нарматыўных актаў у галіне знешняга гандлю.
Сама арганізацыя з’яўляецца форумам, на якім у працэсе калектыўных абмеркаванняў і перамоў фарміруюцца правілы міжнароднага гандлю і разглядаюцца пытанні скарачэння бар’ераў на яго шляху.
На выстаўцы прадстаўлена больш за 70 дакументаў на рускай і англійскай мовах. Большую частку экспазіцыі складаюць дакументы міжнародных арганізацый: кнігі, брашуры, мімеаграфаваныя матэрыялы, перыядычныя выданні, буклеты.
Экспазіцыя сладаецца з наступных тэматычных раздзелаў:
- Гісторыя ўтварэння СГА, яе асноўныя мэты, задачы і прынцыпы функцыянавання;
- Рэгуляванне сусветнага гандлю ў межах шматбаковых пагадненняў і правіл СГА;
- Замежны вопыт уступлення ў СГА;
- Рэспубліка Беларусь на шляху ў СГА.
Выстаўка прызначана для спецыялістаў у галіне сусветнай эканомікі, знешнегандлёвай дзейнасці, фінансава-крэдытных зносін, кіраўнікоў і работнікаў прамысловых прадпрыемстваў, студэнтаў і выкладчыкаў, навуковых супрацоўнікаў, а таксама для ўсіх, хто цікавіцца пытаннямі сусветнай эканомікі і міжнароднага гандлю.
Карысныя спасылкі
 |
 |
