З 14 мая па 4 чэрвеня ў Нацыянальнай бібліятэцы Беларусі (2-гі паверх, кальцавы калідор) арганізавана выстаўка “Пад бацькоўскім дахам”, прымеркаваная да Міжнароднага дня сям’і (15 мая).
Сям’я – найважнейшы сацыяльны інстытут сучаснага грамадства, аснова фарміравання здаровай нацыі. Дзякуючы сям’і, развіваецца і ўмацоўваецца дзяржава, расце дабрабыт народа.
У экспазіцыі, прапанаванай Нацыянальнай бібліятэкай Беларусі, прадстаўлена каля 200 дакументаў, сярод якіх даведачныя і энцыклапедычныя выданні, манаграфіі, альбомы, буклеты.
У першым раздзеле выстаўкі – “Грамадства ў мініяцюры” – экспануюцца кнігі, у якіх сям’я разглядаецца як асноўны элемент грамадства, захавальніца чалавечых каштоўнасцей, культуры і гістарычнай пераемнасці пакаленняў.
Разуменню хрысціянскіх асноў стварэння сям’і, яе ўмацаванню можа спрыяць літаратура, прадстаўленая ў раздзеле “Сям’я: святыя ісціны”. Аўтары кніг выступаюць за вяртанне ў жыццё высокамаральных прынцыпаў і хрысціянскай дабрадзейнасці.
Жадаючы стварыць надзейную, трывалую і шчаслівую сям’ю, многія маладыя людзі яшчэ да ўступлення ў шлюб цікавяцца мастацтвам быць разам. У раздзеле “Надвор’е ў доме!” сабраны выданні на тэму псіхалогіі сямейных адносін, сумяшчальнасці мужа і жонкі, кіравання сямейнымі канфліктамі і захавання шлюбу.
Выхаваць здаровае, актыўнае і ўпэўненае ў сабе дзіця – значыць даць яму паспяховы старт у жыцці. Кнігі, якія прадстаўлены ў раздзеле “Разумныя бацькі – шчаслівыя дзеці!”, раскажуць дарослым, як знаходзіць паразуменне з дзіцём, развіваць яго фізічны і інтэлектуальны патэнцыял, арганізаваць жыццёвую прастору і навучанне “асаблівых” дзяцей, ладзіць запамінальныя дзіцячыя святы, захоўваць даверлівыя адносіны з падлеткамі.
Выстаўка будзе цікавай для шырокага кола чытачоў і наведвальнікаў бібліятэкі.
Кантактны тэлефон: (8 017) 293 28 86.