З 4 па 30 лістапада ў зале беларускай літаратуры (пам. 205) праходзіць юбілейная выстаўка “Па жыцці з родным словам”, прысвечаная 100-годдзю з дня нараджэння вядомага беларускага вучонага-мовазнаўца М. Р. Судніка (1910–1995).
Міхаіл Раманавіч Суднік быў чалавекам шырокага гісторыка-філалагічнага кругагляду, выдатным знаўцам беларускай літаратурнай мовы, збіральнікам і даследчыкам яе лексічнага скарбу. Яго навуковыя інтарэсы ў першую чаргу былі звязаны з беларускай лексікалогіяй і лексікаграфіяй.
Значную частку экспазіцыі складаюць лексікаграфічныя працы, у стварэнні якіх вучоны прымаў удзел як аўтар-укладальнік, сааўтар, рэдактар, арганізатар распрацовак. Сярод іх – “Арфаграфічны слоўнік” (1948), “Русско-белорусский словарь” (1953), “Беларуска-рускі слоўнік” (1962), “Слоўнік асабовых уласных імён” (1965; 2-е выд., 2005), “Русско-белорусский словарь общественно-политической терминологии” (1970), “Тлумачальны слоўнік беларускай мовы” (т. 1–5, 1977–1984) і інш.
На выстаўцы таксама можна азнаёміцца з працамі М. Судніка, прысвечанымі гісторыі станаўлення і развіцця беларускага мовазнаўства, артыкуламі па розных аспектах беларускай арфаграфіі, вынікамі яго рэдактарскай работы. У экспазіцыю ўключаны матэрыялы з біяграфічнымі звесткамі пра Міхаіла Раманавіча Судніка.
Кантактны тэлефон: 293-27-16.
 |
 |
 |
 |
