16 красавіка ў музеі кнігі ў знак салідарнасці і спачування адкрылася выстава, прысвечаная сабору Парыжскай Божай Маці.
15 красавіка адбылася сапраўдная культурная катастрофа – пажар у саборы Нотр-Дам-дэ-Пары ў Францыі. Гэты гатычны храм з’яўляецца не толькі сімвалам французскай сталіцы, але таксама скарбам сусветнай культуры. Людзі з усяго свету ехалі ў Парыж, каб паглядзець на гэты архітэктурны шэдэўр. Ён прывабліваў шматлікіх мастакоў і пісьменнікаў.
Лёс сабора на працягу стагоддзяў складваўся па-рознаму. Ён неаднаразова разбураўся і ўзводзіўся нанова. У XIX ст. храм знаходзіўся ў такім дрэнным стане, што ставілася пытанне пра яго знос. Выратаванню сабора ад руйнавання і здабыццю славы шмат у чым спрыяў аднайменны гістарычны раман Віктора Гюго, апублікаваны ў 1831 г. У 1841 г. пачалася рэстаўрацыя храма, якая працягвалася больш за 20 гадоў.
У Нацыянальнай бібліятэцы Беларусі захоўваюцца ўнікальныя матэрыялы, якія даюць уяўленне пра выгляд сабора ў XVIII–XIX стагоддзях. На выстаўцы можна пабачыць выданні 1830-х гг. славутага рамана В. Гюго, эстампы з відамі Нотр-Дама мастака Шарля Мер’ёна 1850-х гг., выявы інтэр’ераў сабора з каранацыйнага альбома Напалеона Банапарта 1804 г., абрысы храма на карце Парыжа 1734 г. і інш.
Час работы выставы адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.
Выстава будзе працаваць у музеі кнігі (пам. 347) да 21 мая 2019 г.
Тэлефон для даведак: (8 017) 293 27 22.
