З 26 чэрвеня 2008 года Нацыянальная бібліятэка Беларусі арганізавала тэматычную кніжную выстаўку «Незалежная Беларусь – наш агульны і надзейны дом», прысвечаную Дню Рэспублікі (3 ліпеня).
3 ліпеня займае асаблівае месца ў гісторыі і лёсе беларускага народа. Коштам небывалых ахвяр і разбурэнняў дасталася нам свабода. Гэта свята заваявана кроўю і ратнымі подзвігамі тых, хто, не шкадуючы свайго жыцця, змагаўся за незалежнасць Радзімы ў гады Вялікай Айчыннай вайны. Менавіта таму наш народ вызначыў дзень вызвалення г. Мінска датай галоўнага свята краіны –Дня Незалежнасці Рэспублікі Беларусь. Моцная і квітнеючая Беларусь – лепшы помнік паўшым і жывым, усім, хто ў жорсткіх бітвах адстаяў незалежнасць нашай краіны!
Экспазіцыю адкрываюць рэспубліканская кніга «Памяць Беларусі» (2005 г.) і зборнік успамінаў, дакументаў, хронікі партызанскага руху і падпольнай барацьбы 1941-1944 гг. «Беларусь непокоренная» (2005 г.) – даніна памяці ўсім, хто адваяваў Перамогу.
Выстаўка налічвае больш за 100 дакументаў, якія адлюстроўваюць сучасны стан суверэннай Беларусі. Нацыянальная эканоміка, сучасная знешняя палітыка беларускай дзяржавы, стан і перспектывы інавацыйнага развіцця навукі, адукацыі і культуры, Узброеныя Сілы Рэспублікі Беларусь, гісторыя і сучаснасць эканамічнага правасуддзя, дзяржаўныя галіновыя праграмы, развіццё турызму ў Беларусі – усе гэтыя сферы жыццядзейнасці нашай краіны змястоўна прадстаўлены ў экспазіцыі.
Выстаўка размешчана на 2-м паверсе атрыума.
Кантактны тэлефон: 293-28-86.