З 17 сакавіка па 13 красавіка ў зале выяўленчых і відэадакументаў (пам. 307) праходзіць выстаўка “Недзе далёка між гор…”.
Горы заўсёды вабілі да сябе людзей: што там, за тым перавалам? Якія далячыні адкрыюцца з гэтай вяршыні?
Існуе нямала горных краін, у тым ліку невялікіх старажытных каралеўстваў і княстваў, якія толькі дзякуючы гарам і захавалі свае самастойнасць, культуру, традыцыі, звычаі. Горы захоўваюць памяць і пра вялікія горныя цывілізацыі, напрыклад імперыю інкаў, а таксама пра шматлікіх мужных людзей, якія прысвяцілі і нават аддалі сваё жыццё гарам, асуджаючы сябе на цяжкасці, выпрабаванні і нястачу.
Кажуць, што чалавек, які хоць бы раз пабыў у гарах, пакідае там сваё сэрца…
Не раз апелі і будуць апяваць мастакі і пісьменнікі ўрачыстую веліч і прыгажосць гор з іх мудрагелістымі спляценнямі хрыбтоў, завоблачнымі вяршынямі, глыбокімі цяснінамі і каньёнамі, на дне якіх у вечным змроку шуміць вада.
Прадстаўленыя на выстаўцы рэпрадукцыі і фотаальбомы захапляюць і зачароўваюць горнымі пейзажамі. Сярод работ – “Месяцовая ноч. Наваколле Ялты” І. Айвазоўскага, “Зарослы грот у Сарэнта” С. Шчадрына, “Над палямі – марскія горы…” М. Валошына, “Пад гарой” А. Кашая і многія інш.
Заварожваюць прыгажосцю горныя вяршыні Алтая, Цянь-Шаня і Паміра, якія можна ўбачыць у фотаальбоме “Горы Центральной Азии” (2009).
Сярод дакументаў экспазіцыі – такія выданні, як "Горы мира" (2012), "Большая коллекция русских художников" (2008), "Чудеса природы" (1996) і інш.
Дапаўняюць выстаўку публікацыі з кніг і перыядычных выданняў па дадзенай тэматыцы.
Кантактны тэлефон: (8 017) 293 27 58.