З 11 сакавіка па 11 красавіка ў Нацыянальнай бібліятэцы Беларусі (2-гі паверх, кальцавы калідор) праходзіць юбілейная выстаўка, прысвечаная 175-годдзю з дня нараджэння Францішка Багушэвіча (1840–1900).
“Не пакідайце ж мовы нашай беларускай, каб ня ўмёрлі…” – з такім заклікам любіць і шанаваць родную мову звяртаўся да беларусаў у прадмове да свайго першага зборніка вершаў “Дудка беларуская” (1891) пісьменнік-дэмакрат, заснавальнік крытычнага рэалізму, паэт, публіцыст, празаік і перакладчык Францішак Бенядзікт Казіміравіч Багушэвіч, з імем якога даследчыкі звязваюць развіццё і станаўленне беларускай літаратурнай мовы, а таксама нараджэнне беларускай байкі.
З нагоды юбілею Ф. Багушэвіча бібліятэка прапануе кніжную выстаўку, на якой прадстаўлена больш за 100 выданняў, прысвечаных яго жыццю і творчасці.
У першым раздзеле “Творчая спадчына” прадстаўлены творы Ф. Багушэвіча. Сярод іх – ксеракопія прыжыццёвага выдання першага зборніка паэта “Dudka вialaruskaja” (1891) і факсімільныя выданні гэтай кнігі на лацініцы; рэпрынтнае выданне апавядання “Tralalonaczka” (1892), адзіны вядомы арыгінал якога знаходзіцца ў бібліятэцы Ягелонскага ўніверсітэта (г. Кракаў); арыгіналы выданняў Багушэвіча “Песні” (1904), “Dudka вialaruskaja” (1914), “Смык беларускі” (1922). Экспануюцца зборнікі твораў беларускага пісьменніка, якія былі выдадзены ў розныя гады і перакладзены на іншыя мовы: рускую, украінскую, англійскую, польскую, сербскую, балгарскую. У раздзеле змешчаны таксама кнігі пра творчасць Ф. Багушэвіча.
Другі раздзел “Жыццёвы шлях” прысвечаны старонкам біяграфіі Францішка Багушэвіча, яго сябрам і аднадумцам, асяроддзю паэта. Экспануецца шэраг кніг У. Содаля, вядомага даследчыка жыцця і творчай спадчыны “беларускага дудара”.
Шмат вядомых сучасных паэтаў выказваюць павагу і ўдзячнасць Ф. Багушэвічу ў сваіх вершах. Гэтыя вершы, звесткі пра памятныя мясціны, звязаныя з паэтам, можна знайсці ў раздзеле “Помнім, шануем, ганарымся...”.
Кантактны тэлефон: (8 017) 293 28 86.
 |
 |
 |
 |
 |
 |
 |
 |
 |
 |
 |
 |
 |
 |
 |
