З 23 лістапада па 9 студзеня ў аддзеле абслугоўвання афіцыйнымі дакументамі (пам. 207) адкрыта тэматычная выстава “Не маўчаць! Жанчыны і насілле”, прысвечаная Міжнароднаму дню барацьбы за ліквідацыю насілля адносна жанчын.
Прадстаўленыя дакументы адлюстроўваюць шматгранную дзейнасць ААН, іншых міжнародных арганізацый, жаночых рухаў і аб’яднанняў, накіраваную на барацьбу з насіллем адносна жанчын, знаёмяць з рознымі аспектамі вывучэння гендарных праблем, раскрываюць ролю жанчыны ў сучасным грамадстве.
У экспазіцыі прадстаўлена каля 100 дакументаў на рускай, англійскай, французскай і нямецкай мовах: кнігі, перыядычныя выданні, мімеаграфаваныя матэрыялы ААН, брашуры, буклеты.
Сярод прадстаўленых дакументаў – міжнародныя і нацыянальныя прававыя дакументы, даклады Камітэта па ліквідацыі дыскрымінацыі адносна жанчын, манаграфіі, матэрыялы навукова-практычных канферэнцый, вучэбныя дапаможнікі.
Выстава складаецца з наступных раздзелаў:
- Прававыя дакументы, накіраваныя на ліквідацыю насілля адносна жанчын
- Праблема насілля адносна жанчын у Рэспубліцы Беларусь
- Дамашняе насілле, спыненні насілля адносна жанчын у сям’і
- Жанчына і ўзброеныя канфлікты
- Жанчына як тавар – праблема гандлю людзьмі
- Сацыяльная няроўнасць і гендарная дыскрымінацыя
Выстава будзе цікавая студэнтам, выкладчыкам, сацыяльным педагогам, псіхолагам, юрыстам, спецыялістам у сферы процідзеяння гандлю людзьмі, актывістам праваабарончых і няўрадавых арганізацый.
Міжнародны дзень барацьбы за ліквідацыю насілля адносна жанчын быў абвешчаны Генеральнай асамблеяй ААН 17 снежня 1999 года (рэзалюцыя 54/134) і штогод адзначаецца 25 лістапада.
Насілле распаўсюджана ва ўсім свеце і ўласціва ўсім грамадствам і культурам, закранаючы жанчын незалежна ад іх расы, этнічнай прыналежнасці, сацыяльнага становішча, дастатку, паходжання або любых іншых абставін. Гэта з’ява складаная і шматгранная. Яна праяўляецца як у зусім відавочных фактах, так і завуалявана пад звыклымі для нашага жыцця з’явамі. Каб вынішчыць гэта канчаткова, неабходны ўсёабдымныя меры, якія замацаваны заканадаўча і маюць грамадскі характар.
Усведамляючы важнасць гэтай праблемы, 20 снежня 1993 года Генеральная асамблея прыняла Дэкларацыю аб выкараненні насілля адносна жанчын (A/RES/48/104), а ў лютым 2008 года Генеральны сакратар ААН Пан Гі Мун абвясціў аб пачатку правядзення кампаніі “Разам спынім насілле адносна жанчын”. У 2017 годзе Еўрапейскі саюз і ААН пачалі ажыццяўленне новай доўгатэрміновай глабальнай ініцыятывы “Прамень святла”, накіраванай на выкараненне ўсіх форм насілля адносна жанчын і дзяўчынак.
У Рэспубліцы Беларусь надаецца вялікая ўвага рашэнню праблем такога насілля. Стратэгія дзейнасці нашай дзяржавы накіравана на папярэджанне, спыненне і выкараненне гэтага зла. Гэтай стратэгіі Беларусь прытрымліваецца і на міжнароднай арэне. Яна выступіла арганізатарам шэрагу міжнародных мерапрыемстваў, накіраваных на фарміраванне эфектыўнага глабальнага партнёрства супраць рабства і гандлю людзьмі ў XXI стагоддзі і насілля адносна жанчын.
Карысныя спасылкі
Дэкларацыі, канвенцыі і пагадненні
- Тыпавыя стратэгіі і практычныя меры па выкараненні насілля адносна жанчын у галіне папярэджання злачыннасці і крымінальнага правасуддзя (1997)
- Дэкларацыя аб выкараненні насілля адносна жанчын (1993)
- Канвенцыя аб ліквідацыі ўсіх форм дыскрымінацыі адносна жанчын (1979)
(гл. таксама Факультатыўны пратакол) - Кіраўніцтва для парламентарыяў: Канвенцыя аб ліквідацыі ўсіх форм дыскрымінацыі адносна жанчын і Факультатыўны пратакол да яе
- Дэкларацыі па правах жанчын
- Канвенцыі па правах жанчын
Дадатковыя рэсурсы
- Міжнародны дзень барацьбы за ліквідацыю насілля адносна жанчын
- Жанчыны, мір і бяспека
- Міжнародны жаночы дзень (8 сакавіка)
- Міжнародны дзень вясковых жанчын (15 кастрычніка)
- Дзень праў чалавека (10 снежня)
Сістэма ААН
- Структура “ААН-жанчыны”
- Дэпартамент па эканамічных і сацыяльных пытаннях
- Глабальная 16-дзённая кампанія
- 16 дзён актыўных дзеянняў
- “Разам спынім насілле адносна жанчын”
- Факты, якія павінен ведаць кожны
- COVID-19 і насілле адносна жанчын
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 26.
Матэрыял пададзены аддзелам абслугоўвання афіцыйнымі дакументамі.