З 1 верасня па 31 кастрычніка ў зале прававой інфармацыі (пам. 207b) праводзіцца кніжная выстаўка “Найвялікшае права – быць маці”, прысвечаная Дню маці ў Рэспубліцы Беларусь.
У лёсе кожнага чалавека ўсё самае добрае і святое звязана з імем Маці, увасабленнем пяшчоты і цеплыні. З першага слова “мама” мы вучымся гаварыць і ўсведамляць сваё прызначэнне на зямлі. Любоў маці нараджае ў нас імкненне рабіць дабро і змяняць жыццё да лепшага. Матчына любоў – невычэрпная крыніца сілы і надзеі, да якой людзі звяртаюцца ў радасныя і складаныя моманты жыцця.
Штогод з 1996 года 14 кастрычніка ў нашай краіне адзначаецца Дзень маці. Гэты Дзень сімвалізуе асобае стаўленне дзяржавы і кожнага чалавека да жанчыны-маці – захавальніцы дамашняга ачага, дабра і маральнасці, з’яўляючыся прызнаннем таго, што ад матчынай любові і разумення, стойкасці і цярпення залежыць лёс кожнага з нас, а таксама – будучыня краіны.
Дзяржаўная палітыка ў Рэспубліцы Беларусь накіравана на ўмацаванне і падтрымку сям’і, мацярынства як асновы дзяржаўнасці, рэалізацыю права дзіцяці пражываць і выхоўвацца ў сям’і. Мэтанакіраваная сацыяльная падтрымка маці ажыццяўляецца ў адпаведнасці з Законам Рэспублікі Беларусь “Аб дзяржаўнай дапамозе сем’ям, якія выхоўваюць дзяцей”. Ён прадугледжвае аднаразовую і штомесячную дзяржаўную дапамогу на дзяцей. Сістэма сацыяльнай абароны маці і дзіцяці ўключае таксама льготы па харчаванні дзяцей, аплаце за дашкольныя ўстановы.
Аднымі з асноўных напрамкаў дзейнасці сістэмы аховы здароўя Рэспублікі Беларусь з’яўляюцца дзяржаўная падтрымка мацярынства і дзяцінства, ахова здароўя маці і дзіцяці, стварэнне ўмоў для нараджэння здаровых дзяцей, памяншэнне інваліднасці з дзяцінства, скарачэнне смяротнасці сярод немаўлят, дзяцей і маці. Рашэнне задач па ахове здароўя маці і дзіцяці ажыццяўляецца ў адпаведнасці з Законамі Рэспублікі Беларусь “Аб ахове здароўя”, “Аб правах дзіцяці”, Кодэксам аб шлюбе і сям’і, Нацыянальнай праграмай дэмаграфічнай бяспекі Рэспублікі Беларусь на 2011–2015 гады, Дзяржаўнай праграмай прафілактыкі ВІЧ-інфекцыі на 2011–2015 гады і іншымі нарматыўнымі прававымі актамі. У адпаведнасці з Законам “Аб ахове здароўя” цяжарнай жанчыне гарантуецца медыцынскае назіранне ў дзяржаўных арганізацыях аховы здароўя, стацыянарная медыцынская дапамога пад час і пасля родаў, а таксама медыцынская дапамога і медыцынскае назіранне за нованароджанымі.
Дзень маці дапамагае нам яшчэ мацней адчуць веліч і святасць найважнейшай місіі жанчыны, звязанай з нараджэннем і выхаваннем дзяцей, усвядоміць яе велізарную ролю ў захаванні і ўмацаванні духоўных каштоўнасцей, маральных ідэалаў у грамадстве і перш за ўсё – сямейных. Стваральная роля маці, пазітыўныя жыццёвыя арыенціры дзяцей – гэта тыя асновы, без якіх немагчыма ўмацаванне прэстыжу сям’і, духоўнае адраджэнне грамадства.
Экспазіцыя налічвае звыш 50 дакументаў: кнігі, брашуры, перыядычныя выданні.
Выстаўка ўключае наступныя тэматычныя раздзелы:
- Правы жанчын у Рэспубліцы Беларусь.
- Сацыяльная падтрымка маці ў Рэспубліцы Беларусь.
- Ахова здароўя маці і дзіцяці ў Рэспубліцы Беларусь.
Кантактны тэлефон: (8 017) 293 27 28.
 |
 |
 |
