З 6 ліпеня па 9 жніўня ў аддзеле абслугоўвання афіцыйнымі дакументамі (2-гі паверх, пам. 207) адкрыта кніжная выстаўка “Народанасельніцтва свету: з клопатам пра будучыню”.
Выстаўка прысвечана Сусветнаму дню народанасельніцтва і 40-годдзю стварэння Фонду Арганізацыі Аб’яднаных Нацый у галіне народанасельніцтва (ЮНФПА).
Гэты Дзень адзначаецца штогод 11 ліпеня па рашэнні Савета кіраўнікоў Праграмы развіцця Арганізацыі Аб’яднаных Нацый (Рашэнне ПРААН 89/46, п.21). Упершыню ён праводзіўся ў ліпені 1987 года і быў прысвечаны з’яўленню пяцімільярднага жыхара планеты.
Святкаванне Дня народанасельніцтва павінна звярнуць увагу сусветнай грамадскасці на неадкладнасць і важнасць вырашэння дэмаграфічных праблем, на пошук шляхоў павышэння ўзроўню і якасці жыцця людзей ва ўсім свеце, фарміраванне здаровага ладу жыцця. Гэтыя і многія іншыя задачы стаяць і перад створаным у 1969 годзе Фондам Арганізацыі Аб’яднаных Нацый у галіне народанасельніцтва (ЮНФПА). Асноўнымі напрамкамі дзейнасці фонду з’яўляюцца аказанне садзейнічання дзяржавам ва ўдасканаленні паслуг у галіне рэпрадукцыйнага здароўя, падтрымка намаганняў, накіраваных на ўстойлівае развіццё народанасельніцтва.
З 1994 года ЮНФПА актыўна пачаў дзейнічаць і ў Рэспубліцы Беларусь. Кожная ініцыятыва фонду адказвае глабальнай мэце: забяспечыць права кожнай жанчыны і кожнага мужчыны на здаровае жыццё і роўныя магчымасці для яе захавання. Дзейнасць фонду заснавана на нацыянальных прыярытэтах і цесным узаемадзеянні з урадам Рэспублікі Беларусь.
Праграмы Фонду ААН у галіне народанасельніцтва ў Беларусі ахоплівае наступныя тэматычныя сферы:
- дэмаграфія (народанасельніцтва і развіццё);
- рэпрадуктыўнае здароўе моладзі;
- гендэрная роўнасць.
Прапанаваныя ўвазе чытачоў і наведвальнікаў бібліятэкі матэрыялы выстаўкі знаёмяць з дэмаграфічнымі тэндэнцыямі, ацэнкамі і прагнозамі ў галіне народанасельніцтва, а таксама з сусветнай дэмаграфічнай статыстыкай і палітыкай па пытаннях народанасельніцтва.
Выстаўка ўключае наступныя тэматычныя раздзелы:
- дзейнасць міжнародных арганізацый у галіне народанасельніцтва;
- дзейнасць ЮНФПА;
- народанасельніцтва, навакольнае асяроддзе, адукацыя і развіццё;
- колькасць насельніцтва і дэмаграфічныя тэндэнцыі: сусветныя статыстычныя даныя;
- дэмаграфічная сітуацыя, чалавечы і сацыяльны капітал Рэспублікі Беларусь.
Экспазіцыя налічвае каля 100 дакументаў: кнігі, брашуры, перыядычныя выданні, мімеаграфаваныя матэрыялы. Большую частку выстаўкі складаюць дакументы на рускай, французскай, нямецкай і англійскай мовах.
Выстаўка будзе цікавая для выкладчыкаў, аспірантаў і студэнтаў вышэйшых навучальных устаноў гуманітарнага і эканамічнага профіляў, навуковых работнікаў, спецыялістаў у галіне дэмаграфіі, сацыёлагаў, работнікаў органаў дзяржаўнага кіравання, а таксама для ўсіх тых, хто цікавіцца сацыяльна-дэмаграфічнымі і сацыяльна-эканамічнымі праблемамі.
Карысныя спасылкі
- Дзейнасць ААН у галіне народанасельніцтва
- Сусветны дзень народанасельніцтва (11 ліпеня 2007 года)
- Штогадовыя даклады (1997–2002 гады)
- Народанасельніцтва свету ў 2007, 2006, 2005, 2004 і 2003 гадах
- Расказ пра місіі Фонду
- ЮНФПА ў Беларусі і Расійскай Федэрацыі
- Паслы добрай волі
- Міграцыя моладзі – Народанасельніцтва свету ў 2006 годзе (маладзёжнае выданне)
- Народанасельніцтва свету ў 2008 годзе