З 18 па 28 студзеня ў зале беларускай літаратуры арганізавана юбілейная выстаўка “На шляху да ісціны”, прысвечаная 80-годдзю з дня нараджэння Міхася (Міхаіла Іосіфавіча) Мушынскага.
М. І. Мушынскі, знакаміты літаратуразнавец, крытык, тэкстолаг, абраны членам-карэспандэнтам НАН Беларусі, з’яўляецца лаўрэатам Дзяржаўнай прэміі Беларусі (1980), доктарам філалагічных навук, прафесарам.
У экспазіцыі больш за 110 дакументаў, якія сістэматызаваны ў тры раздзелы. У першым раздзеле – “Адданасць прызванню” – змешчаны работы вучонага, у якіх раскрыты найбольш характэрныя асаблівасці этапаў развіцця гісторыі беларускай крытыкі, літаратуразнаўства, а таксама яго даследаванні пра жыццё і творчасць беларускіх пісьменнікаў Я. Коласа, М. Гарэцкага, М. Зарэцкага і інш. На выставачных паліцах дэманструюцца кнігі Міхаіла Іосіфавіча “Ад задумы да здзяйснення: творчая гісторыя «Новай зямлі» і «Сымона-музыкі»” (1965), “Беларуская крытыка і літаратуразнаўства, 20–30-я гады” (1975), “Якуб Колас. Летапіс жыцця і творчасці” (1982), “І нічога, апроч праўды: якой быць «Гісторыі беларускай літаратуры»” (1990), “Праўдзівая гісторыя жыцця і творчасці Міхася Зарэцкага” (2005), “Тэксталогія твораў Янкі Купалы і Якуба Коласа”, “Падзвіжнік з Малой Багацькаўкі: жыццёвы і творчы шлях Максіма Гарэцкага” (2008), “Мае Каласавіны” (2010) і інш.
Цікавасць для чытачоў мае і другі раздзел экспазіцыі – “Ад задумы да здзяйснення”, – дзе знаходзяцца грунтоўныя шматтомныя выданні класікаў беларускай літаратуры, у якіх змешчаны прадмовы і каментарыі М.І. Мушынскага. Значнае месца ў экспазіцыі займаюць зборнікі калектыўных работ і матэрыялаў навуковых канферэнцый, а таксама перыядычныя выданні з артыкуламі аўтара. Экспаніруюцца дакументы, над якімі Міхаіл Іосіфавіч працаваў у якасці складальніка і рэдактара.
Міхаіл Іосіфавіч Мушынскі як таленавіты навуковец хутка і чуйна рэагуе на літаратуразнаўчыя праблемы. Асобны раздзел – “Нястомны даследчык” – расказвае пра жыццёвы шлях і навуковую дзейнасць юбіляра.
Кантактны тэлефон: 293-27-16.