З 21 снежня па 14 студзеня ў зале выяўленчых і відэадакументаў (пам. 307) ладзіцца выстаўка “На карысць Радзіме”, прысвечаная 180-годдзю з дня нараджэння рускага калекцыянера, мецэната, дабрачынца П.М. Траццякова (1832–1898).
Выдатны дзеяч айчыннай культуры Павел Міхайлавіч Траццякоў прысвяціў сваё жыццё адной ідэі, адной мэце – збіранню твораў рускай школы жывапісу, каб “нажытае ад грамадства вярнулася б таксама грамадству (народу) у... карысных установах”. Ён сапраўды стварыў такую карысную ўстанову – першы рускі агульнадаступны музей, у якім нацыянальны жывапіс паўстаў не ў разрозненых мастацкіх з’явах, а як нешта адзінае і суцэльнае.
Сваёй амаль паўвекавой збіральніцкай дзейнасцю, падтрымкай найбольш таленавітых і яркіх мастакоў Павел Траццякоў не менш, чым ідэолагі “перадзвіжнікаў” – Іван Крамской або Уладзімір Стасаў, – аказаў уплыў на фарміраванне мастацкай культуры Расіі другой паловы XIX ст. і дапамог яе росквіту.
Дом Траццякова ў Замаскварэччы, “у Талмачах”, дзе быў пакладзены пачатак галерэі, паступова разрастаўся, перабудоўваўся разам з ростам калекцыі і ўжо з 70-х гадоў XIX ст. шырока наведваўся публікай. І дом, і неацэнны збор жывапісу былі перададзены ў дар Маскве ў 1892 г. У склад калекцыі ўваходзіў і выдатны збор французскага мастацтва памерлага брата – Сяргея Міхайлавіча Траццякова. У пачатку XX ст. калекцыя налічвала чатыры тысячы карцін.
Пасля рэвалюцыйных змен 1917 г. Траццякоўская галерэя ўключала Музей іканапісу і жывапісу (збор Ільі Астраухава), Цвяткоўскую галерэю з найкаштоўнейшай калекцыяй рускага малюнка, збор рускіх карцін Румянцаўскага музея і некаторыя прыватныя калекцыі. Цяпер у зборы галерэі звыш 150 тысяч твораў мастацтва.
Прадстаўленыя на выстаўцы дакументы адлюстроўваюць найбольш яркія моманты біяграфіі мецэната. Шмат увагі таксама адведзена лёсам нашчадкаў вялікага збіральніка – А.П. Боткінай, В.П. Зілоці, Л.П. Грыцэнкі і іншым слаўным прадаўжальнікам роду. Дапаўняюць экспазіцыю рэпрадукцыі найбольш значных палотнаў са збору галерэі.
На выстаўцы прадстаўлена звыш 80 дакументаў.
Кантактны тэлефон: (8 017) 293 27 58.