З 3 чэрвеня па 31 ліпеня ў зале нотных і аўдыядакументаў (пам. 305) праходзіць выстаўка “Музыка вялікага дыхання”, прысвечаная 110-годдзю з дня нараджэння армянскага кампазітара, дырыжора, педагога Арама Ільіча Хачатурана.
Імя Арама Хачатурана шырока вядома аматарам музыкі ва ўсім свеце. Арыгінальны і яркі почырк кампазітара пазнаецца з першых жа гукаў. Захоплівае магутны тэмперамент і жыццёвая сіла яго музыкі, яркі эмацыянальны меладызм, разнастайныя віды танцавальнасці, пластыка музычных ліній, якая тонка адчуваецца, шчодрая маляўнічасць, раскоша аркестравага пісьма.
У сваёй творчасці Арам Хачатуран на дзіва тонка перадае настроі герояў. Яго музыку няма неабходнасці дапаўняць словамі, у ёй мудрагеліста пераплятаюцца старадаўнія народныя матывы і сучасныя акорды.
На выстаўцы прадстаўлены творы кампазітара, напісаныя ў розных жанрах. Наведвальнікі маюць магчымасць убачыць нотныя выданні сусветна вядомых балетаў “Спартак” і “Гаянэ”, трох сімфоній, трох канцэртаў для саліруючых інструментаў (скрыпкі, фартэпіяна, віяланчэлі) з аркестрам, трох канцэртаў-рапсодый. Сярод дакументаў экспазіцыі – песні кампазітара, музыка для тэатра і кіно (да камедыі Лопе дэ Вегі “Валенсіянская ўдава”, драмы М. Лермантава “Маскарад”, п’есы Б. Лаўранёва “Лермантаў”), сюіты з музыкі да балетаў, тэатральных пастановак, кінафільмаў, фартэпіянная музыка, сачыненні для скрыпкі, віяланчэлі, камерныя ансамблі, творы ў пералажэнні для баяна, а таксама п’есы для дзяцей, напісаныя ў розныя гады.
Побач з нотнымі выданнямі на выстаўцы экспануюцца аўдыязапісы твораў аўтара. Дапаўняюць экспазіцыю кнігі пра жыццё і творчасці майстра і ілюстрацыйны матэрыял.
Кантактны тэлефон: (8 017) 293 27 52.
 |
 |
 |
 |
 |
 |
