З 15 лістапада па 16 снежня ў зале выяўленчых і відэадакументаў (пам. 307) праходзіць выстаўка “Музыка фарбаў, гармонія вобразаў”, прысвечаная 75-годдзю заснавання грамадскага аб'яднання “Беларускі саюз мастакоў”
Больш як сем дзесяцігоддзяў назад, у снежні 1938 г., адбыўся I З’езд мастакоў БССР і праз паўтара гады 35 жывапісцаў, скульптараў і графікаў сталі членамі маладой творчай арганізацыі.
Не з пустым рукамі дайшлі мастакі да гэтага аб’яднання. Легендарная Віцебская мастацкая школа і бліскучыя імёны класікаў – М. Шагала, К. Малевіча, М. Дабужынскага, Л. Лісіцкага, Р. Фалька – былі маякамі пры складаных пошуках новых шляхоў у жывапісе. І ўжо першая Усебеларуская мастацкая выстаўка, якая прайшла ў 1925 г., прадэманстравала велічыню патэнцыялу маладых творчых сіл, якія заявілі аб сабе ў паслярэвалюцыйным мастацтве.
З гэтага моманту было перажыта многае: страшная Вялікая Айчынная вайна, калі беларускія творцы змянілі пэндзлі і разцы на аўтаматы і бушлаты, складаны перыяд пасляваеннага ліхалецця з цвёрдымі рамкамі таталітарнага рэжыму і, нарэшце, гады хрушчоўскай адлігі, у якія мастакі робяць спробу вызвалення ад непарушных ідэалагічных догмаў.
Сёння беларускае мастацтва ўяўляе сабой даволі складаную карціну. Каларыстыка, напрамкі, стылі надзвычай разнастайныя – ад старога добрага рэалізму да абстрактнага экспрэсіянізму, ад канцэптуалізму да метафарычнай вобразнасці, ад неарэалізму да перформансу. Беларускі мастацтвазнавец і крытык Б. Крэпак адзначыў: “З’явіліся такія здаровыя моманты, як вера мастакоў у творчы запал і незалежнасць, самааддача ў сцвярджэнні новых пластычных прыёмаў і ідэалаў…”.
Адкрываюць выстаўку рэпрадукцыі работ членаў Беларускага саюза мастакоў. Працягваюць – шматлікія даведачныя і энцыклапедычныя выданні; альбомы з карцінамі майстроў; кнігі, прысвечаныя жыццю і творчасці З. Азгура, А. Бембеля, М. Савіцкага, А. Кішчанкі, Л. Шчамялёва, В. Шаранговіча і іншых дзеячаў мастацтва.
Сярод экспанатаў – выданні, якія сталі пераможцамі ў намінацыі “Лепшае выданне па выяўленчым мастацтве”. Гэта – кніга Н. Шаранговіч “Гаўрыіл Вашчанка. Народжаны Палессем: нататкі пра жыццё і творчасць” (2008) і інш.
Выклічуць цікавасць у наведвальнікаў выстаўкі таксама матэрыялы, прадстаўленыя ў перыядычных выданнях і кнігах серыі “Знакамітыя мастакі з Беларусі”.
Усяго ў экспазіцыі прадстаўлена звыш 100 дакументаў.
Кантактны тэлефон: (8 017) 293 27 58.
 |
 |
 |
 |
 |
 |
 |
 |
 |
 |
 |
 |
 |
 |
 |
