З 8 кастрычніка да 11 лістапада ў Нацыянальнай бібліятэцы Беларусі (2-гі паверх, кальцавы калідор) арганізавана выстаўка “Музычная культура Беларусі”, прымеркаваная да Дня работнікаў культуры.
Да свята работнікаў культуры традыцыйна ладзяцца кніжныя выстаўкі, прысвечаныя розным напрамкам беларускай культуры. Тэма сёлетняй выстаўкі выбрана ў сувязі з аб'яўленым ЮНЕСКА Годам Агінскага.
Музычная культура ахоплівае розныя бакі духоўнай дзейнасці грамадства і творчай самарэалізацыі чалавека. Яна непасрэдна звязана з культурна-гістарычным развіццём грамадства. З цягам часу творчы патэнцыял, багацце форм, жанраў узрасталі і сістэма музычнай культуры станавілася адной з асноў музычна-гістарычнага працэсу. Гэта спрыяла плённаму развіццю творчага патэнцыялу культуры ў цэлым.
На выстаўцы “Музычная культура Беларусі” прадстаўлена больш за 150 дакументаў: даведачныя і энцыклапедычныя выданні, вучэбныя дапаможнікі, манаграфіі, зборнікі артыкулаў, матэрыялы навуковых канферэнцый, альбомы, буклеты па гісторыі і сучасным стане музычнай культуры Беларусі.
Экспануюцца кнігі, якія датычацца тэатральнай, сімфанічнай, камернай музыкі, вакальнага, інструментальнага і вакальна-інструментальнага выканання, ад класічных напрамкаў да рок-музыкі.
Прадставіцца магчымасць пабачыць буклеты, якія пазнаёмяць з ўстановамі адукацыі і падрыхтоўкі творчых кадраў.
Прадстаўнікам беларускай акадэмічнай музыкі прысвечана навукова-папулярнае выданне Т.Г. Мдзівані і В.Р. Гудзей-Каштальян “Композиторы Беларуси”. Біяграфічныя партрэты І.М. Лучанка, Я.А. Глебава, С.А. Картэса, А.Ю. Мдзівані прыведзены ў аўтарскай серыі Т.Г. Мдзівані “Современные белорусские композиторы”.
Асобны раздзел выстаўкі прадстаўляе культурную сталіцу Беларусі 2015 года – горад Брэст і яго музычна-тэатральныя падзеі. Гісторыя горада налічвае амаль 1000 гадоў. Ён уваходзіць у тройку найстарэйшых гарадоў краіны разам з Полацкам і Туравам. З Брэстам таксама звязаны пачатак нотадрукавання на тэрыторыі Беларусі.
Экспануемыя выданні будуць спрыяць вывучэнню айчыннай музычнай спадчыны і здабыткаў сучаснага беларускага мастацтва.
Кантактны тэлефон: (8 017) 293 28 86.