З 8 па 28 лютага ў зале нотных і аўдыявізуальных дакументаў (пам. 305) праходзіць выстаўка “Мовай музыкі”, прысвечаная 75-годдзю беларускага кампазітара Алега Міхайлавіча Чыркуна.
Імя Алега Чыркуна добра вядома музычнай грамадскасці нашай краіны. Вось ужо больш за 40 гадоў ён, заслужаны дзеяч мастацтваў Рэспублікі Беларусь (2011), уладальнік медаля Францыска Скарыны (2005), працуе ў самых розных жанрах. Яго музыка ў любой аўдыторыі знаходзіць удзячных і зацікаўленых слухачоў. Яна адразу становіцца блізкай і зразумелай.
Доўгае творчае жыццё кампазітара ў мастацтве сабрала скарбонку выдатных твораў у розных жанрах – сімфанічныя паэмы, кантаты, творы для інструментальнага ансамбля, фартэпіяна, аперэты і мюзіклы.
Аднак галоўнае месца ў творчасці Алега Міхайлавіча займае песня. Адной з найважнейшых асаблівасцей песеннага стылю кампазітара з’яўляецца зварот да розных стылявых вытокаў. Гэта і старадаўні раманс (“Прыязджайце дадому”, “Сняжынка”), і песня-марш (“Паходная войска беларускага”), і эстрадны шлягер (“Ягада-каліна”, “Косіць хлопец канюшыну”). Змест песень ахоплівае шырокі круг тым і з’яў – патрыятычныя і грамадзянскія, лірычныя і апавядальна-рамантычныя, а таксама прысвечаныя роднай айчыне.
На выстаўцы прадстаўлены зборнікі твораў А.М. Чыркуна, сярод якіх “Бацькоўская зямля” (1988), “Дзве крыніцы” (2005), “Не проиграйте бой” (2006), “Маміна свята” (2006) і інш., а таксама аўдыядакументы з фондаў Нацыянальнай бібліятэкі. Наведвальнікі выстаўкі могуць праслухаць творы кампазітара ў выкананні ансамбля народнай музыкі “Святая”, Леаніда Некрашевіча ("Победа"), Уладзіміра Правалінскага, Жанны Піваваравай, Наталлі Салавай ("Нёманам зачараваная") і інш.
Дапаўняюць экспазіцыю публікацыі з перыядычных выданняў пра юбіляра і яго творчасць.
Кантактны тэлефон: (8 017) 293 27 52.