Мовай графікі

З 2 па 30 мая ў зале дакументаў па мастацтве (пам. 306) праходзіць кніжна-ілюстрацыйная выстаўка “Мовай графікі”, прысвечаная 75-годдзю Міхаіла Самуілавіча Басалыгі.

Мастацтва графікі надзвычай шматграннае і разнастайнае, яно дазваляе ўвасабляць мастацкія вобразы з дапамогай ліній, рысак, плям... Па словах самога Міхаіла Самуілавіча, гэта салідны від мастацтва, прытым неабсяжны, бо невядома, дзе яно пачалося і дзе завяршыцца.

Міхаіл Басалыга працуе ў розных тэхніках, аддаючы перавагу лінагравюры, афорту, каляровай літаграфіі. Мастак з’яўляецца стваральнікам ілюстрацый да вялікай колькасці кніг, сярод якіх творы класікаў беларускай літаратуры – Янкі Купалы, Якуба Коласа, Максіма Багдановіча. Рука майстра таксама пазнаецца ў афармленні кніг Зоські Верас, Сяргея Грахоўскага, Станіслава Шушкевіча, Анатоля Вярцінскага, Уладзіміра Карызны, Андрэя Макаёнка, Аркадзя Куляшова, Янкі Сіпакова і многіх іншых беларускіх пісьменнікаў.

На выстаўцы прадстаўлены ілюстрацыі да паэмы “Курган” і вершаў Я. Купалы; зборнікаў лірыкі “Ave Maria”, “Ключ жураўліны” М. Танка; зборнікаў вершаў “Пачуцці”, “Скрыжалі”, “Дзівасіл” А. Лойкі; аповесці ”Дзікае паляванне караля Стаха” У. Караткевіча; гістарычнай драмы А. Петрашкевіча пра Францыска Скарыну “Напісанае застаецца” і іншых.

Значная частка творчасці майстра прысвечана гістарычнай тэматыцы. Мастак адным з першых праілюстраваў “Слова пра паход Ігараў”, мноства работ прысвяціў сярэдневяковай гісторыі Беларусі, захаваў герояў беларускай даўніны. Яго ілюстрацыі адрозніваюцца гістарычнай праўдападобнасцю, перадачай характару эпохі, дакладнасцю малюнка зброі і іншых атрыбутаў прадстаўленага перыяду, а гэтаму спрыяе ўважлівае вывучэнне мастаком гістарычных дакументаў. Цікавасць для наведвальнікаў уяўляе літаграфія “Грунвальдская бітва” і іншыя творы, якія адлюстроўваюць беларускую гісторыю.

Дапаўняюць экспазіцыю ілюстрацыі Міхаіла Басалыгі да беларускіх казак, баек і загадак.

Усяго на выстаўцы прадстаўлена больш за 50 дакументаў.

Кантактны тэлефон: (8 017) 293 27 53.