З 6 жніўня па 21 верасня ў аддзеле абслугоўвання афіцыйнымі дакументамі Нацыянальнай бібліятэкі Беларусі (2 паверх, пакой 207) адкрыта тэматычная кніжная выстаўка "Моладзь XXI стагоддзя: каштоўнасці, пазіцыі, арыенціры", прысвечаная Міжнароднаму дню моладзі.
Гэты дзень быў абвешчаны Генеральнай Асамблеяй ААН 17 снежня 1999 года (рэзалюцыя 54/120) па прапанове Сусветнай канферэнцыі міністраў па справах моладзі (Лісабон, 8-12 жніўня 1998 года) і штогод адзначаецца 12 жніўня.
Міжнародны дзень моладзі — гэта магчымасць яшчэ раз звярнуць увагу сусветнай супольнасці на моладзь, колькасць якой складае 1,2 мільярда чалавек, прывітаць яе дасягнення і садзейнічаць яе ўдзелу ва ўсіх сферах жыцця грамадства.
У апошнія гады ўсё шырэй прызнаецца той факт, што сённяшняе маладое пакаленне – гэта не толькі лідэры ў будучыні, але і ключавыя партнёры ў сучаснасці. Маладыя людзі адкрываюць унікальныя перспектывы і ўносяць неацэнны інтэлектуальны ўклад ва ўздым і развіццё грамадства ў сваіх краінах. Яны з’яўляюцца актыўнымі партнёрамі ў ажыццяўленні глабальных намаганняў па дасягненні мэт у галіне развіцця, сфармуляваных у Дэкларацыі тысячагоддзя. Моладзь па-ранейшаму знаходзіцца ў авангардзе барацьбы з ВІЧ/ СНІДам, беднасцю і голадам.
Прапанаваная тэматычная выстаўка заклікана прыцягнуць увагу чытача да сацыяльных, эканамічных і палітычных аспектаў удзелу моладзі ў забеспячэнні прагрэсу і ўстойлівага развіцця грамадства. Моладзь прыкладае нямала намаганняў, каб іх галасы былі пачуты, і прысвячае ўвесь свой запал і творчыя здольнасці агульнай справе пабудовы больш дасканалага і развітога свету.
Выстаўка ўключае наступныя тэматычныя раздзелы:
-
моладзь і грамадства: удзел моладзі ў грамадска-палітычным жыцці і сацыяльных ініцыятывах;
-
міжнародныя прававыя дакументы і праграмы, што датычаць моладзі;
-
статыстычныя дадзеныя аналізу становішча моладзі і тэндэнцый яе развіцця;
-
адукацыя моладзі;
-
моладзь і рынак працы;
-
моладзь і здароўе;
-
маладзёжная палітыка ў Рэспубліцы Беларусь.
У экспазіцыі ёсць больш за 100 публікацый ААН, ЮНЕСКА, Савета Еўропы і Еўрапейскага Саюза на рускай, англійскай, французскай і нямецкай мовах: кнігі, перыядычныя выданні, брашуры, буклеты, мімеаграфаваныя матэрыялы.
Выстаўка будзе цікавая для студэнтаў, выкладчыкаў, працоўнай моладзі, а таксама для ўсіх тых, хто цікавіцца маладзёжнай палітыкай.
Спасылкі на інтэрнэт-рэсурсы
