З 7 чэрвеня па 31 жніўня ў зале прававой інфармацыі (пам. 207b) ладзіцца выстаўка “Моладзь: вашы правы”, прысвечаная Міжнароднаму дню моладзі.
Міжнародны дзень моладзі ўстаноўлены Генеральнай Асамблеяй ААН 17 снежня 1999 года па прапанове Сусветнай канферэнцыі міністраў па справах моладзі, якая адбылася ў Лісабоне 8–12 жніўня 1998 года. Упершыню гэты Дзень святкаваўся 12 жніўня 2000 года. Дзень моладзі адзначаецца і ў іншых краінах свету, дзе кожная дзяржава ўстанавіла свае даты.
Галоўнай мэтай свята з’яўляецца актывізацыя маладога пакалення, падахвочванне яго да дзейнасці на карысць аднагодкаў, грамадскасці, а таксама прапанова ўладам ідэй, якія датычацца рашэнняў праблем маладых людзей у гэтай краіне.
Па класіфікацыі ААН, узрост тых, хто адносіцца да моладзі, складае ад 15 да 24 гадоў. На сёння гэта 1,2 мільярда чалавек, гэта значыць 18 % сусветнага насельніцтва. 87 % з іх пражываюць у краінах, якія развіваюцца, і пакутуюць ад абмежаванага доступу да рэсурсаў, паслуг аховы здароўя, адукацыі, прафесійнай падрыхтоўкі, працаўладкавання, а таксама эканамічных магчымасцей.
Дзяржавы – члены ААН прызнаюць, што маладое пакаленне ва ўсіх краінах з’яўляецца рэзервам для развіцця, станоўчых сацыяльных змен і тэхналагічных інавацый. Ідэалы, энергічнасць і шырыня поглядаў моладзі адыгрываюць цэнтральную ролю ў працэсе пастаяннага развіцця іх грамадстваў.
Маладыя людзі не проста карыстаюцца вынікамі змен, але і самі спрыяюць ім. Дэманструючы адданасць, энтузіязм і вынаходлівасць, яны ўносяць свой уклад у працэс развіцця, звяртаючыся да найбольш вострых праблем, што паўстаюць перад грамадствам.
Намаганні моладзі спрыялі выкараненню галечы і голаду ў сацыяльным асяроддзі, барацьбе супраць ВІЧ/СНІДу пасродкам навучання аднагодкаў, а таксама прапагандзе аховы навакольнага асяроддзя. Акрамя таго, маладыя людзі выступалі наватарамі, падтрымліваючы дыялог, разуменне і павагу паміж людзьмі з розных культурных і рэлігійных “гарызонтаў”.
Часта маладое пакаленне само задае тон, ведучы “зялёны” і здаровы лад жыцця, захоўваючы навакольнае асяроддзе, прапагандуючы арыгінальнае выкарыстанне новых тэхналогій, напрыклад, мабільных прылад і анлайнавых сацыяльных сетак, а таксама выбудоўваючы масткі да стварэння адкрытых для ўсіх грамадстваў. Уклад моладзі ў мясцовае, нацыянальнае, рэгіянальнае і сусветнае развіццё варта прызнаваць і падтрымліваць.
Дзень моладзі ў Беларусі адзначаецца штогод у апошнюю нядзелю чэрвеня.
У Беларусі маладзёжная палітыка даўно стала адным з прыярытэтных напрамкаў дзейнасці дзяржавы. Толькі за апошнія некалькі гадоў рэалізавана мноства маладзёжных праграм і праектаў. Значна вырасла роля маладзёжных сродкаў масавай інфармацыі. Створаны дзясяткі дзіцячых і маладзёжных тэлевізійных перадач. Нараўне з гэтым ідзе актыўная работа па ўдасканаленні сістэмы дашкольнай, базавай і сярэдняй адукацыі, рэфармуецца вышэйшая школа, удасканальваецца прававая база.
Дзень маладых людзей – гэта не толькі падстава для свята, гэта яшчэ і час задумацца пра найлепшую рэалізацыю свайго патэнцыялу для дабрабыту самога сябе, сваёй сям’і, сваёй краіны.
Экспазіцыя налічвае звыш 50 дакументаў.
Выстаўка ўключае наступныя тэматычныя раздзелы:
- Абарона праў моладзі ў міжнародных дакументах.
- Маладзёжная палітыка беларускай дзяржавы.
- Правы і гарантыі маладых спецыялістаў у Рэспубліцы Беларусь.
Кантактны тэлефон: 293-27-28.
Карысныя спасылкі
Афіцыйныя дакументы ААН
- Сусветная праграма дзеянняў, якія датычацца моладзі, да 2000 года і на наступны перыяд
- Дапаўненне да Сусветнай праграмы дзеянняў, якія датычацца моладзі
- Дэкларацыя аб распаўсюджванні сярод моладзі ідэалаў міру, узаемнай павагі і ўзаемаразумення паміж народамі
Сайты Рэспублікі Беларусь
- Беларускі рэспубліканскі саюз моладзі
- Беларуская рэспубліканская скаўцкая асацыяцыя
- Ліга добраахвотнай працы моладзі
- Спецыяльныя фонды Прэзідэнта Рэспублікі Беларусь