З 14 верасня па 15 кастрычніка ў аддзеле абслугоўвання афіцыйнымі дакументамі Нацыянальнай бібліятэкі Беларусі (2-гі паверх, пам. 207) адкрыта тэматычная кніжная выстаўка «Мір у імя чалавека», прысвечаная Міжнароднаму дню міру.

Гэты дзень быў устаноўлены Генеральнай Асамблеяй ААН у 1981 годзе для «пашырэння і ўкаранення ідэалаў міру як ва ўнутраных адносінах усіх дзяржаў і народаў, так і ў адносінах паміж імі». Праз дваццаць гадоў Асамблея пастанавіла штогод адзначаць гэта свята 21 верасня (як дзень глабальнага спынення агню і адмаўлення ад насілля) і прапанавала ўсім дзяржавам і народам спыніць ваенныя дзеянні на працягу гэтага дня (A/RES/55/282).

У Міжнародны дзень міру прадстаўніцтва Арганізацыі Аб’яднаных Нацый, дзяржаўныя і недзяржаўныя ўстановы, арганізацыі грамадзянскай супольнасці, рэлігійныя групы праводзяць па ўсім свеце шматлікія мерапрыемствы і ўрачыстыя цырымоніі з мэтай прапаганды ідэалаў міру і адмаўлення ад насілля.

Праз прапаганду Дня міру ААН прыцягвае ўвагу да сваёй рознабаковай дзейнасці па гэтым пытанні і падштурхоўвае асобных людзей, групы і суполкі на ўсёй планеце да асэнсавання праблем міру, абмену інфармацыяй і практычным вопытам. Гэта свята прызначана абудзіць у многіх людзей думку пра тое, якой можа быць іх роля ў пошуках міру і які асабісты ўклад яны могуць унесці ў справу міру. Сёлета Генеральны сакратар ААН Пан Гі Мун заклікаў урады і людзей усёй планеты засяродзіць увагу на пытаннях ядзернага раззбраення і нераспаўсюджання зброі і аб’явіў пачатак кампаніі пад лозунгам «Мы мусім раззброіцца». Ён яшчэ раз падкрэсліў, якую пагрозу ўяўляе сабой ядзерная зброя і прапанаваў кожнаму, каму дораг мір, унесці ў правядзенне кампаніі сваю лепту, подпісаўшы Дэкларацыю для падтрымкі намаганняў, якія прадпрымаюцца ААН з мэтай пазбавіць свет ад ядзернай катастрофы.

Леташнія падзеі – вайна, тэрарызм, ваенныя расходы, глыбокія супярэчнасці, што раздзяляюць народы і асобных людзей ва ўсім свеце, – абумовілі беспрэцэдэнтную актуальнасць Міжнароднага дня міру і сёлета.

Прапанаваная выстаўка налічвае больш за 100 дакументаў, якія раскрываюць дзейнасць міжнародных арганізацый, дзяржаўных і недзяржаўных устаноў і груп у галіне падтрымкі міру і бяспекі. Вялікую частку экспазіцыі складаюць дакументы міжнародных арганізацый (ААН, ЮНЕСКА, Еўрапейскага саюза, Савета Еўропы і інш.) на рускай і англійскай мовах: кнігі, перыядычныя выданні, мімеаграфаваныя матэрыялы ААН.

Выстаўка ўключае наступныя тэматычныя раздзелы:

міжнародныя пагадненні і міжнародна-прававыя дакументы па падтрымцы міру і бяспекі;
раззбраенне, ядзернае раззбраенне;
аперацыі па падтрымцы міру;
міратворчасць і мірабудаўніцтва;
барацьба з тэрарызмам і ядзерным тэрарызмам;
правы чалавека і падтрыманне міру;
дэмакратызацыя і культура міру.

Выстаўка будзе цікавай спецыялістам у галіне сусветнай палітыкі, дыпламатыі, міжнародных адносін, міжнароднага права, канфлікталогіі, а таксама студэнтам, магістрантам, палітычным і грамадскім дзеячам і ўсім тым, каму дораг мір на Зямлі.

Карысныя спасылкі:

Мір у імя чалавека

Інфармацыйныя рэсурсы

Паслугі