З 23 ліпеня па 31 жніўня 2008 года ў Нацыянальнай бібліятэцы Беларусі праходзіць выстаўка "Мір. Свята. Слава.", прысвечаная XXIX Алімпійскім гульням.
Напэўна, няма чалавека на зямлі, які быў бы раўнадушны да Алімпійскіх гульняў. Задоўга да чарговага алімпійскага года рыхтуюцца да яго ўсе краіны свету. Спецыяльныя камітэты абмяркоўваюць і вырашаюць, у якой краіне праводзіць Гульні. Трэніруюцца будучыя ўдзельнікі, хвалююцца суддзі, тамяцца чаканнем гледачы. І, нарэшце, раз у чатыры гады, знамянальны дзень настае.
Алімпійскія гульні — гэта велічнае, дзіўнае свята маладосці і прыгажосці, здароўя і сілы. Гэта грандыёзнае відовішча сусветнага майстэрства, якое на 2-3 тыдні аб'ядноўвае ўсё чалавецтва, прыкоўваючы ўвагу мільёнаў людзей з розных краін нашай планеты.
Да XXIX летніх Алімпійскіх гульняў у Пекіне Нацыянальная бібліятэка Беларусі і Нацыянальны архіў Рэспублікі Беларусь падрыхтавалі тэматычную кніжную выстаўку «Мір. Свята. Слава.».
У экспазіцыю ўвайшло больш за 300 дакументаў з фондаў НББ і НАРБ. Прадстаўленыя на выстаўцы матэрыялы пазнаёмяць чытачоў і наведвальнікаў бібліятэкі з гісторыяй узнікнення Алімпійскага свята ў Старажытнай Грэцыі, з адраджэннем Алімпійскіх гульняў у канцы XIX стагоддзя, з асноўнымі прынцыпамі алімпійскага руху, сімволікай Алімпійскіх гульняў, Алімпійскай гісторыяй Рэспублікі Беларусь, відамі спорту летніх Алімпійскіх гульняў, з краінай, дзе праходзяць XXIX летнія Алімпійскія гульні.
Вялікую цікавасць уяўляюць таксама архіўныя дакументы па выніках выступлення беларускіх спартсменаў на Маскоўскай Алімпіядзе - 80 і найбагацейшы матэрыял па падрыхтоўцы і правядзенні Алімпіяды - 80.
Выстаўка прызначана для ўсіх аматараў спорту і размяшчаецца ў кальцавым калідоры трэцяга паверха.
 |
 |
 |
 |
 |
 |
 |
 |
 |
 |
 |
 |
