З 5 лютага па 1 сакавіка ў зале выяўленчых і відэадакументаў (пам. 307) дзейнічае кніжна-ілюстрацыйная выстаўка “Майстар нацюрморта, партрэта і пейзажа”.
Выстаўка прысвечана 200-годдзю з дня нараджэння беларускага і рускага мастака Івана Трафімавіча Хруцкага (1810–1885).
Іван Трафімавіч працаваў у розных жанрах жывапісу, такіх як нацюрморт, пейзаж, партрэт, інтэр’ер. Аднак галоўным дасягненнем мастака стала стварэнне шэрага выдатных нацюрмортаў, якія далі пачатак развіццю гэтага жанру ў рускім мастацтве.
Палотны, напісаныя Іванам Хруцкім, ствараюць дзіўную атмасферу цішыні і спакою, суцішаюць і настройваюць на радаснае ўспрыняцце жыцця. Па-майстэрску валодаючы пэндзалем, мастак рупліва ўзнаўляў натуру, дабіваючыся амаль ілюзорнага яе адлюстравання. Ужо за першую карціну “Кветкі і плады” (1836, Дзяржаўная Траццякоўская галерэя) малады мастак быў ганараваны Вялікім сярэбраным медалём Акадэміі мастацтваў “…за напісанне з натуры пладоў і фруктаў”. Яго работы нязменна мелі вялікі поспех у публікі і спарадзілі хвалю перайманняў.
У сённяшні час творы Івана Трафімавіча Хруцкага захоўваюцца ў многіх музейных зборах, у тым ліку ў Дзяржаўнай Траццякоўскай галерэі, Дзяржаўным рускім музеі, Нацыянальным мастацкім музеі Рэспублікі Беларусь.
На выстаўцы прадстаўлена каля 100 дакументаў. Гэта альбомы, кнігі, артыкулы, паштоўкі і рэпрадукцыі работ знакамітага мастака.
Экспазіцыя разлічана на ўсе катэгорыі чытачоў, якія цікавяцца гісторыяй нацыянальнага мастацтва і творчасцю Івана Трафімавіча Хруцкага.
Кантактны тэлефон: 293-27-58.